Shillong, Ïaïong 14:
Wat la ha kine ki khyndiat sngi ki khubor ki la saphriang stet ba ki ar ngut ki MLA ka People’s Democratic Front (PDF) kin rung noh sha ka NPP, hynrei u President ka NPP Meghalaya Dr. W.R Kharlukhi um shym la ïoh jingtip eiei.
Haba ïakren bad u Dr. W.R Kharlukhi u la pynpaw ba ka jingbym tip ïa kane ka jingthmu ki MLA ka PDF ban rung sha ka NPP ka dei namar u dang wan na Delhi ba u don jingshitom, hynrei mynta u la kham ïoh bor haba u la wan sha Shillong.
U la ong ba kane ka jingïakren ka lah ban ïaid lyngba u President ba rangbah ka NPP, u Conrad Sangma uba dei ruh u Myntri Rangbah ka jylla ne u Vice-President ba rangbah ka NPP Bah Prestone Tynsong uba dei ruh u Symbud Myntri Rangbah ka jylla.
“Nga ruh nga shu ïohi tang ha ki kot khubor ba ki MLA ka PDF kin rung sha ka NPP, hynrei kaba bha tam ka long ban kylli na kitei ki MLA ka PDF ban ïoh jingshai” u la ong.
Ha kajuh ka por u la pynpaw ïa ka jingsngewkmen lada kita ki MLA ka PDF ki wan rung sha ka NPP namar kan nang pynkhlaiñ shuh ïa ka seng nangne shakhmat.
Nalor nangta, u la ong biang ba lada baroh ki seng saiñ pyrthei ki wan pynïasoh sha ka NPP kata ka dang bha shuh shuh.
Wat la u President ka NPP u Dr. W.R Kharlukhi u kyntait halor kane ka khubor, hynrei ki khubor kiba tikna na ki nongkitkam ka NPP ki la pyntip ba kane ka jingrung ki MLA ka PDF sha ka NPP kan urlong noh shwa ban thep vote ha Sohïong konstitwensi.
