Astana, Iaïong:
Ha ka jingiaknieh rah namlahduh na ka 57kg Freestyle ha ka lympung ialympat kaba long mynta ka Asian Wrestling Championship, ka khubor ka iathuh ba uwei na ki rangialympat ka ri u Aman Sehrawat u la lah ban khur noh shalade ia katei ka nam jop hadien ka jinglah ban pynrem noh ia u rangialympat na Kyrgyzstan u Almaz Smanbekov da 9-4.
Ha kata ka jingiakhun phainal ki arngut, u Aman uba bat ruh kum u lahduh ha ka U-23, u lah shimpor katto katne na ka bynta ban khur ka 1 dor-thong shakhmat ha ka por ba u Almaz u lah buh ialade ha ka por kaba biang ha ka jingiakhun. Ha ka jingiakhun, u Almaz u lah iakhun da kaba tyngeh lyngba ka jingpynliem ia u nongiakhun pyrshah na ka bynta ban tam shakhmat da 2-1, hynrei u Aman u iai shaniah ha ka jingiakhun tyngeh ka jong u na ka bynta ban wanphai biang sha ka lynti iakhun kaba dei bad tam shakhmat da 3-2 hadien ka jingiakhun kaba nyngkong. Katba ka jingiakhun ka dang iaid shakhmat, utei u rangialehkai ka ri u lah pyni ia kata ka jingiakhun ka bym shongthait ka jong u na ka bynta ban kamai shuh shuh sa saw dor-thong. U Aman u iaisah ha ka jingpynjai-jai ialade bad pyndep ruh ia ka jingiakhun baroh kawei na ka bynta ban khur ia ka jingjop balai.
Kham hashuwa, u Aman u lah jop pyrshah ia u nongialympat na Japan u Rikuto Arai da 7-1 bad ia u nongialympat na China u Wanhao Zou da 7-4 ha ka jingiaid lynti jong u sha ka jingiakhun phainal. Ha kawei pat ka jingiakhun, u Deepak (79kg) u lah pynioh takma Rnong na bynta ka ri hadien ka jinglah ban pynrem noh ia u nongialympat na Mongolia u Byambadorj Bat Erdene da 4-1 hynrei uba lah shah rem noh da 0-10 ha u nongialehkai na Uzbekistan u Bekzod Abdulrakhmonov ha ka semifinal. Shuh shuh ruh u Deepak u lah pynliem noh ia u nongiakhun pyrshah na Tajikistan u Shuhrat Bozorov da 12-1 ha ka jingiakhun jong ki na bynta ka takma Rnong. Kumta ruh u Deepak Nehra (97kg) u lah duh noh ban khur takma Rnong da 9-12 shah pynliem ha u nongialehkai na Uzbekistan u Makhsud Veysalov.
