New Delhi, Iaïong:
U khlur ialehkai kawang Sum ba pawnam bha ka India u Neeraj Chopra uba dang iai bat kum u lahduh Olympic bad Diamond League, un pynkhreh mynta na ka bynta ka jingiada ka jong u ia la ka jong ka khusnam da kaba shimbynta ha ka lympung ialehkai ha Qatar ka Doha Meeting jong ka Diamond League Series ha ka 5 tarik u bnai ban wan.
Kumta u Chopra un sa ioh ruh ka lad ha ka jingpyniasohlang da u lahduh ha ka pyrthei u Anderson Peters na Granada bad u Jakub Vadlejch na Czech Republic ha ka jingiai ap khmih lynti ka jong ki na ka bynta ka jingiakynduh iakhun hapdeng kitei ki rangialehkai. Shuh shuh ruh u Chopra uba lah iai pynjanai shuh shuh ia ka jinglong ba kynsai ka jong u ha ka kam ialehkai da kumba 2 mitar ha ka jinglang ban kawang ia u Sum ha ka jingjngai kaba 89.94m ha u snem ba lah dep ha BAUHAUS-Galan ha Stockholm, u lah shah pynkup ruh da ka khet jingjop ha ka lympung Diamond League ha u snem 2022.
Hynrei u long pat u rangialehkai uba lah duh noh ia ka Doha Leg jong ka Diamond League ha u snem ba lah dep. Kumta ha katei ka lympung ialehkai ka ban wan, yn sa mihkhmat ruh da u Peters u nongjop da 93.07m (Personal Best) ha ka jingiakhun ba lah dep long katei ka lympung ha Doha ha kaba un iakynduh paramarwei bad u Chopra uba ialeh na ka bynta ban kynjoh sha ka jingkawang Sum ba nyngkong da 90m ha ka aiom ialehkai kaba thymmai bad u Vadlejch uba lah wan ba-ar ha ka European Championships bad nongkhur takma Rnong ha ka Eugene World Athletics Championships bad u Vadlejch ruh kumjuh uba lah thaw ia ka rekod ha ka Doha leg da ka jinglah ban kawang Sum ha ka jingjngai kaba 90.88m ha ka jingpyrshang kaba nyngkong.
Kumta ia kitei ki lai ngut ki nongialehkai ba pawkhmat yn sa synranglang ruh da u lahduh ha ka European u Julian Weber na Germany, uba lah wan ba saw ha ka Olympic bad World Championships, Keshorn Walcott bad Julius Yego kiba long kiwei pat ki nongialehkai ki ban shimbynta ha ka lympung.
