New Delhi, Iaïong:
Katkum ki kaiphod ba la ioh lum ha kane ka por, la ong ba ka khlam Covid-19 ka la sdang ban khie bad la shem ruh ba ka jingdon kiba ioh kem pang ha kylleng ki ri ka dew bah Asia ruh ka la nang kiew biang.
La ong ba napdeng ki ri ka Asia, ka Singapore ka dei kaba la sdang shah ktah jur biang ha utei u khñiang jingpang ha une u snem 2023.
Kumta ruh la ong ba katba ka jingdon kiba ioh pang ka la nang kiew, ki ri ha kylleng jong ka Asia ruh ki la ialeh katba lah ban iakhun pyrshah ia utei u khñiang jingpang da kaba tehlakam lyngba ka jingpyniaid bad pynjur ia ki prokram ai tika dawai iada naka bynta jong baroh ki paidbah nongshong shnong khnang ba yn lah ban iakhun pyrshah ia une u khñiang jingpang ba shyrkhei.
La ong ba ka Singapore, ha u Rymphang jong une u snem, ka la pynbna ia ka jingpynsangeh noh ia ka aiñ ban deng ia ki ‘mask’ hadien ba la sakhi ia ka jinghiar jong ka jingdon kiba ioh kem pang hapoh ka ri. Hynrei la ong ba ka jingdon kiba ioh pang Covid ha Singapore ha u Lber ba la leit, ka la sdang ban kiew biang na ka 14,467 ngut ka jingdon kiba ioh kem pang ha ka shi taiew, sha ka 28,000 tam kiba ioh kem pang ha ki taiew shwa ban kut u Lber.
Kumjuh ruh la ong ba ha u snem 2021, ka India ka la mad ia ka jingeh kaba khraw bha na ka jingwan lynshop jong ka khlam Covid-19 hapoh ka ri, ha kaba ki jaka thiah pang ki la dap lut bad ki tyndong lyer ‘Oxygen’ ruh ki la thylli lut, kumta ruh la ong ba ha ka Sngi Palei, ka jingdon kiba ioh pang Covid ha India ka la sdang ban kiew biang sha ka 10,150 ngut.
Kumta ruh la ong ba ka tnat ka koit ka khiah jong ka Vietnam ha kane ka por, ka la bthah ia ki skul bad ki jaka pule ba kin peit thuh bha ia ka jinglong jingman jong katei ka khlam wat ha ki skul bad ki jaka pule khamtam ha ki jaka khappud bad ki khyrdop khappud ba ka jingleit jingwan jong ki paidbah ba napoh bad nabar ruh ka iaid shaid- shaid.
