Shillong, Ïaïong 14:
Ka Pay For Right Football Academy ka la pynjem khnap ïa ka Mawkriah West SC haduh 12-0 kol na ka bynta ban bteng ïa ka jingjop ba ar ha ka lympung ïalehkai Under-10 (Boys) Football League 2023 ha ka sngi Thohdieng ha madan Polo.
U S. Nongbri bad u W. Kharsati ki la thep mar ar kol, katba ïa ki shi kol la thep da u Breden, S.Nongbri, A. Kurbah, K. Rapsang, E.Shabong, S. Nongbri, Nathanial bad u Aaron.
Ha ka jingïalehkai kaba nyngkong ka PFR ka la jop da 5-0 kol ïa ka Mawpat SC. Kumta kane ka kynhun ka la kamai 6 dor-thong (point) na ki ar sien ïakhun bad ka la bat ïa ka kyrdan ba khlieh na ka Group-A.
Ka jingïalehkai ha ka sngi Saitjaiñ kan long hapdeng ka Rangdajied United FC pyrshah ïa ka Them Rangshken ACC ha ka por 10 baje mynstep, ka Mawlai SS&CC ïa ka Madanrting SC ha ka por 11:30 mynstep, ka Summit Academy ïa ka Mawreng SC ha ka por 1:30 noh phai sngi, ka Kick Start FT Academy ïa ka Sohryngkham SC ha ka por 3 baje bad ka Mawpat SC ïa ka Mylliem Grassroot ha ka 4:15 janmiet.
