Warsaw, Iaïong:
Ki pulit ka Poland ki la iathuh ba uwei u nong Ukraine u la thang im ialade ha ka Sngi Palei bad hadien kane la pynkit noh ia u mar-mar sha jaka sumar na ka bynta ki jingsumar ba paka.
La ong ba kane ka la jia ha ka por kumba 8 baje jong ka step Sngi Palei hapoh ka nongbah Krakow, ha kaba utei u rangbah 63 snem u la thang im ialade hapdeng ka jingieng laiñ hakhmat ka jaka sam passport/visa ‘Consulate’ jong ka Ukraine.
La ong ba utei u rangbah ha katei ka sngi, u dang ïeng ap laiñ ban ioh ia ki kot ki sla jingdonkam jong u na katei ka jaka, ha kaba kynsan- kynsan u la hylla bad kren da ka ktien nong Ukraine hi, bad u la sei ia uwei u bilor uba don ia ki kynja umphniang ba kem ding, u la theh ialade bad u la thang im syndon ialade.
La iathuh ruh ba dei u heh pulit uba dei iaid pahara ha katei ka thaiñ bad ki nongsakhi ha katei ka jaka, kiba la iakhun shitom ban pynlip ia ka ding bad ban rah ia utei u briew sha ka jaka sumar ha katei ka sngi.
La ong ba utei u briew ha katei ka sngi u la kiew jingbitar hadien ba kiba bun ki paidbah nong Ukraine kiba don ha katei ka jaka kim pynsngap ia ka jingkhot bad jingkyntu jong u ba kin leit phai biang noh sha Ukraine naka bynta ban iakhun pyrshah ia ka Russia.
Hynrei, ki don pat kiba sakhi bad ki la ong ba um shym la kren eiei pat shaphang katei ka thma Ukraine ha katei ka sngi.
Katba, na ka liang jong utei u rangbah u la phla ba katei ka jingleh jong u ka long namar ba kitei ki bor pyniaid jong katei ka ‘Consulate’ kim shym iarap ia kaei kaba u kyrpad bad pan na ki.
