Shillong, Ïaïong 14:
Ha kawei ka jingjia ha ka thaiñ Rngaiñ ha ka surok Shillong-Pynursla, ka la don ka jingshah ban ki kali ha ki maw bad ka khyndew ha ka janmiet jong ka Sngi Thohdieng.
Kane ka la jia ha ka por kumba 7 baje janmiet eiei, bad ha ka banyngkong, kawei ka kali Tata Sumo ka la shah sei shabar jong ka twa. Katba ki khubor ba la ïohlum, ki ïathuh ba ki dang sa kumba ar tylli ki kali kiba dang sahkut tat haduh ba thoh ïa kane ka khubor.
Kitei ar tylli ki kali kiba dang sahkut na ka jingban jong ki maw bad khyndew ki long ka Datsun RediGo kaba don ïa u nombor ML05 T 7892 bad ka Bolero kaba don ïa u nombor ML06 A 3026. Hynrei ym pat lah ban pyntikna haduh katno ngut ki briew ki la don ha kitei kali lane ki la don ne em kiba mynsaw.
Haba ïoh ban ïakren bad ki katto katne ngut ki briew kiba la don ha katei ka jaka, ki la ïathuh ba ka jingkhat bad jingweng ïa ki maw bad khyndew ka dang ïaid khnang ban ïoh sei ïa kitei ki kali.
Na ka liang ki bor sorkar ki la ïathuh ba kim pat lah ban ïathuh bniah namar ka jingpynkhuid ïa ka twa ka dang ïaid.
