Shillong, Ïaïong 16:
Ka Lympung Sengkhihlang kaba laiphew lai ba la pynlong ha Seng Khasi Tyrsad ka la sdang naduh ka 14 tarik bad la pynkut noh mynta ka sngi ka 16 tarik Ïaïong mynta u bnai ka la long kaba iphuh iphieng bha na ka jingwan ban ïashim bynta da ki phew hajar ngut ha kane ka lympung na ki Seng Khasi bad Seiñ Raij.
Ha kane ka sngi ba khatduh jong kane ka lympung la wan ban sakhi da ki nongmihkhmat kum u Bah Sniawbhalang Dhar, Symbud Myntri Rangbah ka Jylla, u MLA ka Jowai u Bah Wailad Shylla, u nongmihkhmat ka Mawphlang u Bah Matthew Kurbah , u MDC ka thaiñ u Bah Lamphrang blah bad kiwei kiwei .
Nalorkata, kaba la pyniphuh iphieng shuh shuh ïa kane ka lympung ka dei na ka jingshad bad rwai tynrai na ki seiñ raij bapher bapher.
Ha kane ka lympung ki la pynshai ba ka jingpynsangeh ban pynlong ïa ka lympung sengkhihlang kaba 33 ha Wahïajer ha ki snem ba la dep ka dei na ka jingwan lynshop ka khlam corona virus.
La pynbna ruh ba ïa ka lympung seng khih lang kaba 34 ka ban long ha u snem 2024 yn pynlong ha seiñ raij Wahïajer, West Jaiñtia Hills.
