Paris:
Ka Cannes Film Festival kaba yn pynlong naduh ka 16 haduh ka 27 jong u bnai ban wan mynta u snem kan sa long kaba shongshit bha ha kaba haduh 19 tylli ki phlim kin iakhun na ka bynta ban iohrah ia ka Palme d’Or.
Kane ka tamasa kaba ju khring ia ki khlur ak phlim, nongshna phlim bad direktor na kylleng ki ri ka pyrthei ka long ruh kawei na ki tamasa bakhraw tam eh jong ki phlim bad ha kajuh ka por ka jingpyllait khubor na Cannes ka iathuh ruh ba mynta u snem ha kane ka tamasa kin sa don bun bha ki direktor kynthei ki ban wan shim bynta.
Shuh shuh la iathuh ba ha kane ka tamasa mynta u snem yn sa pynmih bad pyllait paidbah ruh ia ki katto katne ki phlim ba itynnad bad ki khlur ak phlim kiba la pynthikna ban shim bynta sha kane ka tamasa kin kynthup u Tom Hanks, Margot Robbie bad ka Scarlett Johansson.
Napdeng ki phlim ki ban pyni bad pyllait paidbah ha kane ka tamasa kin kynthup ruh ka bynta bathymmai jong ka Indiana Jones, ka phlim u Martin Scorsese bad ha kajuh ka phlim u Joihnny Depp.
Ha ka jingshisha wat lada ki don hi ki nongshna phlim bad direktor kynthei kiba ju wan shim bynta ha kane ka tamasa manla u snem hynrei yn sakhi pat ba mynta u snem ki kham bun ban ia ki snem ba la leit bad napdeng ki direktor kynthei ki ban wan sha kane ka tamasa kin kynthup ruh ka Alice Rohr wacher ka direktor ba na Italy, ka Jessica Hausner jong ka Austria bad kiwei kiwei.
Yn plie paidbah ia kane ka tamasa mynta u snem da ka phlim jong u Johnny Depp kaba direk da u Jeanne du Barry, ha kaba une u tyngshop ula ak kum u Syiem ka France u Louis XV.
Kiwei kiwei de ki phlim ba itynnad yn sa pyni ha kane ka tamasa mynta u snem.
