Shillong, Ïaïong 16:
Kum shi bynta ban kyntiew ïa ka kam jngoh kai pyrthei, u MLA ka Mawkynrew u Bah Banteidor Lyngdoh u la hiar sha shnong Rasong, ka shnong kaba ïaid da ka kjat bad don sha them na ka jaka jngoh kai ha Laitlum, ha kaba u la buh thong ban buh ïa ka jaka bam bad jaka sah ha shiteng riat jong kane ka jaka khnang ban pynsuk ïa ki nongwan jngoh kai sha kane ka jaka.
U Bah Banteidor u la hiar sha Rasong dang shen ban ai khublei ïa ki nongshong shnong na ka bynta ka jingkyrshan kaba ki la ai ha ka elekshon MLA ba dang shu dep bad u la kular ban kyntiew ïa ka kam jngoh kai hapdeng ka shnong Laitlum bad Rasong.
Ha kane ka jingleit jngoh, u Bah Banteidor u la jurip ïa ka Aganwadi Centre kaba la donkam ban shna pynbha bad ïamir jingmut bad ki nongshong shnong ban wanrah da ki Cable Car Ropeway ban hiar bad kiew namar ka shnong kam pat lait surok.
Ha kaba ïadei bad ka surok sha katei ka shnong, u Bah Banteidor u la kular ban thaw ki lad ki lynti ban pynurlong ïa ka. U la ïamir jingmut ruh ban wanrah ïa ki Processing Unit ban myntoi ki nongrep soh rep pai ha katei ka shnong lyngba ki Self Help Group.
Na ka liang ka shnong ka la aiti ïa ka dorkhas halor kitei ki mat jingdawa bad na ka liang u Bah Banteidor u la ong ba ka jingïatreilang kan don beit kumba long ha ki snem kiba la dep bad ban kyntiew ïa ka roi ka par ha ka konstitwensi hi baroh kawei bad kine ki jingdawa na ka liang ka shnong yn sa peit bniah ban pynurlong ïa ki.
Ha kawei pat ka liang, ha ka 11 tarik mynta u bnai une u MLA ka Mawkynrew, u la hiar jurip ïa ka jingpyntrei ïa ka Sub Centre ha Mawlat bad kumjuh ïa ka jingtrei kaba dang ïaid shaid-shaid ban tei ïa ka ophis u BDO ka Mawkynrew C&RD Block ha ka jingïadonlang ki nongïalam shnong, u Bah G Dhar, BDO kane ka Block lem kiwei pat.
