Shillong, Ïaïong 16:
U nongïalam ka Congress ha Meghalaya uba dei ruh u MP ka Shillong, u Bah Vincent H Pala u la ong ba lada phah ïa kita ki pulit pahara Central Armed Police Force (CAPF) ban peitngor ïa ka jingshalan dewïong kam don jingmut lada ym don ka jingïatreilang na ka Sorkar Jylla. U la ai ka jingïaroh ïa u Symbud Myntri Rangbah u Bah Prestone Tynsong da kaba ong ba kata ka kynhun “high level” ka la kylla “zero level” naduh ba la shimti u Bah Tynsong ban peit ïa ka tnat pulit ka Jylla.
Dang shen, ka Ïingbishar Meghalaya High Court ka la hukum ban phah pahara 10 pyrton ki pulit CAPF ban peitngor ïa ka jingshalan dewïong beaiñ ha kane ka Jylla.
Hynrei u Bah Pala u la ong ba lada buh da kino kino bor pahara ka Sorkar Pdeng ruh, kam don jingmut namar lada ym don ka jingïatreilang jong ka Sorkar Jylla.
U la ong ba donkam ïa ka jingïatreilang jong ka Sorkar Jylla ban lah ban khanglad ïa kino kino ki jingleh beaiñ.
Halor ka jingdon kita ki kynhun ba nalor lane “high level” kiba shah kynnoh donkti ha ka jingshalan dewïong beaiñ, u Bah Pala u la ong, “nga ai ka jingïaroh ïa u Symbud Myntri Rangbah uba la pynkylla na ka “high level” sha ka “zero level” kumba ka long mynta naduh ba u la shimti ban peit ïa ka tnat pulit ka Jylla, bad mynta ym don shuh kata ka High level.”
U Bah Pala u la ong ba ki don ki nongkhaïi dewïong kiba la ïathuh ïa u ba mynta ym don shuh kita ki “high level” hadien ba la shimti u Bah Prestone ïa ka tnat pulit.
“Kumta, ngam kwah ban shu kynnoh khlem daw namar nga ruh nga tip naduh ba shimti u Bah Prestone, baroh kita ki kynhun ‘high level’ ki la kut lut ha Jylla,” u la ong, da kaba bynrap ba ki kam beaiñ kim long kumba mynshwa ha kaba ka Sorkar ka donkti lang.
U la nong ba mynta kiba shalan dewïong ki ïaid katkum ki challan kiba tikna namar ba ka Coal India Limited (CIL) ruh ka la lilam ïa u dewïong.
U la bynrap ba ki don ki paralok jong u ruh kiba donbynta ha ka kam dewïong ki la ïathuh ba mynta ki ïoh ïa ki Challan ban shalan bad thied ïa u dewïong ba la lilam da ka Coal India Limited, ym shuh da kaba shalan beaiñ.
