Lahore, ïaïong:
Ka jingsdang jong ka jingiaid lynti ka kynhun ialehkai kriket ka Pakistan ha ka lympung ialehkai T20Is pyrshah ia ka New Zealand ka la long kaba seisoh bad ba jop, hadien ba katei ka kynhun ka la rah ia ka thong jingjop pyrshah ia katei ka kynhun ba wan ia aireng ha Lahore.
Ka khubor ka iathuh ruh ba na ka jinglah ban ialehkai bha da ki nongkawang bol ka Pakistan khamtam eh u Haris Rauf ka la pynlong ia katei ka kynhun ban ïoh pynhap bun wiket ha ka jingiakhun ha la iing. Kumta ruh katei ka jingjop ka long ruh kaba kham kyrpang shuh shuh na ka bynta u kapten jong katei ka kynhun ialehkai u Babar Azam uba la lah mynta ban pyniaryngkat ialade bad u kapten barim ka India u MS Dhoni sha ka rekod ba 41 jingjop ha ka jinglong kapten ha katei ka lympung ialehkai.
Ka long ruh ka jing-ialehkai T20Is kaba 100 na ka bynta u Babar bad ruh ka jinglah jong u ban kynjoh mynta sha ka sien kaba 67 kum u kapten jong ka kynhun ialehkai ka jong u. Baroh-lin, u Babar u lah pyniasohlang ialade ha ka kyrdan ba-ar ha ka thup jong ki kapten ha ka jinglah ban khur bun tylli ki jingjop ha kum katei ka lympung ialehkai ba khyndiat over kata hadien u kapten barim ka England u Eoin Morgan bad u kapten ba mynshuwa jong ka Afghanistan u Asghar Stanikzai; ha kaba baroh kitei kum ki kapten ki la lah ban btin lynti ia ka kynhun ialehkai jong ki sha ki jingkhur jingjop sha ka 42 sien jop bad ba u Babar u jngai mynta tang kawei ka jingjop na ka bynta ban ioh thaw ia ka rekod ha ka pyrthei.
Ka khubor ka iathuh ruh ba ka kynhun Pakistan ka shad kmen lang ruh bad ki 100 tylli ki jingialehkai Shabar kiba u Babar Azam u kynjoh ha ki jingialehkai ba khyndiat over ha ryngkat bad ki 88 ron jingjop ha ka jingialehkai T20 ba nyngkong pyrshah ia ka New Zealand ha katei ka jingiakhun ba mynta ha Lahore.
Hynrei u Azam um shym la lah ban pynurlong ia ka kam ialehkai ka jong u ha ka jingiakhun da tang ki 9 ron, hnrei u Fakhar Zaman bad Saim Ayub ki la lah ban kamai mar 47 ron bad kiba la lah ruh ban wanrah ia ki 79 ron ha ka jingiatreilang ka jong ki na ka bynta ka wiket balai bad ban rah ruh ia ka kynhun sha ka 182 ha baroh ki jingshah pynhap wiket ki jong ka ha ki 19.5 over.
U nongkawang bol katei ka kynhun u Haris Rauf, uwei na ki san ngut ki rang-ialehkai ka kynhun uba lah wanphai sha ka kynhun ialehkai hadien ba u lah shah pynshong ha ka jingkhun ba lah dep pyrshah ia ka Afghanistan, uba lah kamai da 18 ron ha ki 4 bol ha kaba ka New Zealand ka la lah ban kamai 94 ha ryngkat bad ka jingshah pynhap wiket lut baroh ha ki 15.3 over.
