Shillong, Ïaïong 16:
Ka jingmih ki khubor ha ki rynsan ‘social media’ ha kine ki sngi halor ka jingshah bat u Pastor bad u Tymmen Basan ka Balang Presbyterian ka la pynlong ïa u Pastor (Rev) GPL Gadew ban pynpaw ba ha India ka jingkylla ka don tang ar tylli, kata kawei ka jingpynkhih win ïa ka niam bad kawei ka dei ka jingpynkhih wan ha ka synshar ka khadar.
Ïa kine ki kyntien u Pastor Gadew u la pynpaw haba sam ïa ka ktien jong U Blei ha ka jingïaseng kaba 1:30 nohphai sngi ha ka jingïaseng Khasi Jaiñtia Presbyterian (KJP) Assembly kaba khatwei ha ka Balang Presbyterian Sutnga kaba hap ha KJP Synod Mihngi, East Jaiñtia Hills District kaba la sdang naduh ka 13 tarik bad pynkut ha ka 16 tarik mynta u bnai.
U Pastor Gadew u la ong biang ba u pastor bad u tymmenbasan ki leit ban peit ïa ki para bangeit ïa ka lyngkha ïalap, hynrei ka jia noh kumto kumba mih ha ‘social media’.
Nangta u la ainguh ïa U Blei uba la phah ïa u Thomas Jones na Wales ban wan ïuhkjat sha ri-lum Khasi haduh ba la lah ban ïoh ki dak thok lajong namar lada pule bad thoh da ki dak Bengali tip aïu kan jia ïa ka jaidbynriew.
Kumta u la kyntu ba kam pher lada dei na kano kano ka niam ne ka thaiñ, hynrei kum ka jaidbynriew dei ban sngewnguh ïa u Thomas Jones kaba la wanrah ïa ka jinglong kyrpang ka jaidbynriew.
“Nga sngewkmen ba naduh ba la wanrah u Thomas Jones ïa ka ktien Khasi bad lada ki Khasi ki kren phareng ruh ki ïoh jingïaroh na ki briew kiba im ha ri Europe bad America namar ka jingkynnoh ka long biang bha” u la ong.
Ha kane ka sngi u Pastor Gadew u la sam ïa ka ktien U Blei da kaba pule na ka kitab ka Ester ka Lynnong 4 bad ka dkhot 12-17.
La pynrhem shuh shuh ïa kane ka jingïaseng da kaba ïoh ïa ka jingrwai na ka Balang Sutnga, KJP Synod Sepngi, KJP Synod Mihngi, Balang Nangbah, Mawpat bad Balang Malki.
Ha ka jingïaseng por 10:30 baje mynstep u nongsam ïa ka ktien U Blei u dei u Pastor Laskor.
Katkum ka jingsakhi u nonglum khubor uba wan naduh Shillong la ïohi ba ka jingsahkut kali ka la sdang naduh Mookyndur. Hadien kata ka la bteng biang mar shu poi ha Sookilo kat haduh ba bun kiba wan na Shillong ki poi tang ha ka jingïaseng kaba 1:30 noh phai sngi. Namar kane ka jingdheng kali ka la pynlong ruh ïa ka Balang Malki ban ai ïa ka jingrwai shwa ban wai ka jingïaseng ar sien.
