Shillong, Ïaïong 16:
Ïa ka met kaba sah jong u Bah Krenjulang Khongjirem, 48 snem, ka rta, la ïoh ban sei ha ka step jong ka Sngi U Blei ha ka por kumba 8 baje na Rngaiñ hadien ba u la jah naduh ka miet jong ka Sngi Thohdieng.
Hashwa kane, la ïoh ban sei ïa ka met jong u Bah Seiborlang Jaktung, 42 snem ka rta, ha ka miet jong ka Sngi Saitjaiñ.
Ka khubor na ki pulit ha ka Sngi U Blei ka ïathuh ba kitei arngut ki dei kiba la don ha ka kali Datsun Redigo ba la ñiah da u Bah Seiborlang. Ha ka janmiet jong ka Sngi Thohdieng ka kali kaba ki la shong ka la shah tap ha ki maw bad khyndew hadien ba ka la don ka jingtwa ha Rngaiñ ha ka surok Shillong-Pynursla.
Ki pulit ki la ong ba la pyndep ïa ka jingleh Post Mortem ha Civil Hospital Shillong bad hadien kata, la aiti noh sha ki bahaïing hasem ba kin pyndep ïa kaba sah.
Na ka liang ki pulit ki la ïathuh ba u Bah Seiborlang bad u Bah Krenjulang ki dei na ka shnong Wahlyngkhat, East Khasi Hills.
