Shillong, Ïaïong 16:
U Bah Lambokstarwell Marngar uba la bat ar samoi treikam kum u President ka Khasi Students’ Union (KSU) u lah ban bteng biang sa mynta ka kynti ban bat ïa kane ka shuki ban ïalam ïa ka seng ha kine ki lai snem ban dang wan.
Nalor u Bah Lambokstarwell, u Bah Donald Thabah uba dei u General Secretary ruh un dang bteng ban bat biang ïa kane ka kam na ka bynta ka samoi treikam kaba lai sien.
Katkum ka khubor ba la ïoh lum la sngewthuh ba haduh mynta ki nongkitkam bad ki dkhot ki dang ibit ïa kine ki ar ngut ba kin ïalam ïa ka KSU ha kine ki lai snem ban wan namar ki dang bun ki kam ba ka seng ka hap ban pyndep.
Wat la kitei ar ngut ki nongïalam kim shym la kren shai ha kine ki sngi haba ïakynduh bad u nongthoh khubor, hynrei ka ban pyntikna ïa kane ka kam kan dei ynda la dep ban thep kyrteng ba ka seng ka la dep buh tarik.
Katkum ka kyrwoh ba la phah da ka Election Committee ba la jied da ka CEC jong ka Khasi Students’ Union (KSU), ban pynïaid ïa ka ilekshon kaba XV (15) sha ka shlem trei kam jong ka KSU na ka bynta ka samoi trei kam 2023-2026. Ka pynbna ïar lyngba kane ka kyrwoh ba ka ilekshon kan long ha ka 06 tarik u Jymmang, 2023naduh ka por 8 baje mynstep haduh 3 baje janmiet ha Dinam Hall, Jaïaw, Shillong.
Ha kaba ïadei bad kane ka phang, kane ka Committee ka khot ka wer ïa baroh ki khun samla kiba la ih jong ka bri u hynñiewtrep, khamtam na ka liang ki dkhot jong ki unit bapher-bapher ka KSU ba kin mih shakhmat ban ïa kit ïa bah lem ïa ka lyngkor ba khia jong ka KSU na ka bynta ka ri bad ka jaitbynriew da kaba ïashim bynta shit rhem kum ki kyrtong ha katei ka ilekshon. Ïa ki jingtip ba kham bniah halor kane ka kam lah ban ïoh na ka shlem trei kam ka KSU ha Jaïaw Chapel Road, Shillong.
Katto katne ki mat kiba kongsan ki long ïa ki kot thep kyrteng ne “nomination paper” yn sdang ban ai naduh ka 14 tarik u Ïaïong haduh ka 20 tarik u Ïaïong, 2023 naduh ka por 11 baje mynstep haduh 5 baje janmiet ha shlem treikam ka seng.
Ka por na ka bynta ban pynpoi ïa katei ka kot thep kyrteng kan long naduh ka 15 tarik u Ïaïong haduh ka 20 tarik u Ïaïong, 2023 haduh ka por 5 baje janmiet. Ka jingweng kyrteng lada don kan long ha ka 21 tarik u Ïaïong haduh ka por 5 baje janmiet.
Ka jingbishar ïa ki kot thep kyrteng kan long ha ka 22 tarik u Ïaïong, 2023 ha ka por 1:00 baje noh phai sngi.
Ïa katei ka kot thep kyrteng dei ban pynpoi ha lane shwa jong katei ka tarik ba la kdew haneng ha u Chairman lane Secretary ka Election Committee.
Ka Election Committee ka bthah ïa baroh ki Unit, Circle, Area Unit, Division bad District Unit ban pynpoi ïa ki kyrteng jong ki nongjied kaba long 10 ngut na kawei kawei ka shnat treikam (unit) hapoh ka 25 tarik u Ïaïong, 2023 ha shlem trei kam ka seng ha Jaïaw.
Ki post ki ban pynïakhun ki long President, Vice-President, General Secretary, Assistant General Secretary, Education Secretary, Organising Secretary, Information & Publicity Secretary, Office Secretary, Sports & Cultural Secretary bad Environment Secretary.
Haba ïa dei bad ka jingmih (result) na kane ka ilekshon yn pynbna hi ha kane kajuh ka sngi.
Ka Committee ka pyntip ba ka la jied ïa ki katto katne ki ’riew rangbah, ki nonghikai bad kumjuh ruh na ka liang ki lad pathai khubor ban long kum ki nongpeit pyrman ïa ka jingïaid beit ïaid ryntih jong kane ka ilekshon. Kane ka long katkum ka kyrwoh ba la phah da u Bah Danny M Khyriem, Chairman ka Election Committee, KSU bad Bah Samuel Jyrwa, Secretary Election Committee KSU.
