Nongstoiñ, Ïaïong 16:
Ka jylla niam Nongstoiñ ka la sakhi ïa ka jingpynkyntang Lyngdohsad (Bishop) ïa u Rt. Rev. Wilbert Marweiñ ha ka Sngi U Blei ha Pyndengrei da u Lyngdohsad (Archbishop) ka jylla niam bah Shillong, u Most Rev. Victor Lyngdoh, ha ka jingsakhi lang jong ki riewniam bad ki paidbah.
Ïa kane ka jingpynkyntang la pynlong ha St. Peter The Apostle Cathedral Parish ha ka jingsakhi lang jong u Apostolic Nuncio sha India bad Nepal, u Most Rev. Leopoldo Girelli, ki Lyngdohsad jong ki jylla niam ka thaiñ Shatei Lam Mihngi, ki Lyngdoh Sohblei, ki riewniam, u Myntri Rangbah, Conrad K Sangma bad ki paid riewngeit ka Balang Katholik.
Ka jinglehniam ka la long kaba shongkun shongblei bad ka la don ka jingmang Sakramen ba la ïalam da u Bishop thymmai bad hadien kata, la ïoh ïa ka jinglehburom ïa u Nongsharai bathymmai da ki paid riewngeit ka jylla niam Nongstoiñ.
Ka jylla niam Nongstoiñ ka khlem don Lyngdohsad naduh u snem 2016 hadien ba u Lyngdohsad ha ka kato ka por, u Rt. Rev. Victor Lyngdoh, u la shah pynkynriah sha jylla niam Jowai. U Lyngdohsad Victor Lyngdoh u la long u Lyngdohsad banyngkong tam ka jylla niam Nongstoiñ ha u snem 2006 hadien ba la phiah ïa ka bad ka ïa ka jylla niam Jowai na ka jylla niam bah Shillong.
La kha ïa u Rt. Rev. Wilbert Marweiñ ha ka 17 tarik Rymphang, 1970 ha Rangblang – Sohsyniang, South West Khasi Hills District. La pynkyntang Lyngdoh ïa u ha ka 27 tarik u Ïaïong, 2003 na ka bynta ka jylla niam bah Shillong, bad dei ha u snem 2006 ba u la leit pynïasoh noh bad ka jylla niam Nongstoiñ.
Ha u snem 1988, u Rt. Rev. Wilbert u la rung sha St. Paul’s Seminary, Upper Shillong bad hapdeng u snem 1991 bad 1992 u la pule ha St Xavier Minor Seminary. Naduh u snem 1994 haduh 1997, u la pule ïa ka Philosophy ha Christ King College, Shillong, bad hadien ar snem ba u la trei ha Pynursla, u la pule ïa ka Theology ha Oriens Theological College, Mawlai hapdeng ki snem 1999 haduh 2003.
Naduh u snem 2007 haduh 2010, u la don ha nongbah Rome ha kaba u la ïoh ïa ka Licentiate ha ka Missiology na Pontifical Urban University.
Hadien ba u la shah pynkyntang Lyngdoh, u la long kum u Lyngdoh bynrap ha Ummulong Parish naduh 2003 haduh 2005. Naduh 2005 haduh 2007, u la long kum u Procurator jong ka Oriens Theological College, Mawlai.
Nalorkata, hadien ba u la pyndep ïa ki jingpule ha nongbah Rome, u la trei ruh kum u Lyngdoh bynrap ha ka jylla niam Cosenza, Italy naduh 2010 haduh 2015.
Shuh shuh naduh u Nohprah 2015 haduh Risaw 2019, u la long kum u Vicar General ka jylla niam Nongstoiñ, bad ha kajuh ka por, kum u Lyngdoh rangbah ka Divine Saviour Church ha Nonbah.
