Shillong, Ïaïong 16:
Ki pulit pahara Central Armed Police Force (CAPF) kin sa pahara namar ka ilekshon MLA ha Sohïong konstitwensi ha kaba ka jingthep vote kan long ha ka 10 tarik Jymmang.
U Chief Electoral Officer u Bah F.R Kharkongor u la ong ba ha ka 12 tarik u la don ka jingïalang bad ki ophisar kiba peit ïa ka ilekshon lem bad ki heh pulit bad ka jingpynkhreh ka la ïaid ban pynlong ïa ka jingthep vote.
U la ong ba ka Jylla kan ïoh san pyrton ki pulit CAPF ki ban buh ban pahara ha ka sngi thep vote.
Ki don 63 tylli ki jaka thep vote ha Sohïong konstitwensi bad kin don kumba 200 ngut ki nongpynïaid ïa ka jingthep vote.
U CEO u la ong ba ïa ka jingthep kyrteng lah ban thep tang u kyrtong uba pynïakhun ka United Democratic Party (UDP) namar kiwei pat ki kyrtong ki dei kiba la dep thep kyrteng bad la dep peit bniah ïa ki kot ki sla jong ki nalor ba la dep ruh ban pynskhem ïa ka jinglong kyrtong jong ki.
Na ka bynta ban peit bniah ïa ki kot ki sla ruh, yn hap peit bniah tang ïa ki kot ki sla jong u kyrtong ka UDP. Katba kiwei pat ki kyrtong lane ki nongmihkhmat jong ki, ki lah ban don lang ha ka sngi ba peit bniah ïa ki kot ki sla.
Ka jingthep vote ha Sohïong la buhteng namar ka jingkhlad u kyrtong ka UDP u Bah HDR Lyngdoh ha ka 20 tarik Rymphang, 2023.
Ka UDP kan phah ïa u Bah Synshar Lyngdoh Thabah uba dei u pyrsa jong u Bah HDR Lyngdoh kum u kyrtong.
Ka jingthep kyrteng na ka bynta ka UDP kan kut ha ka 20 tarik mynta u bnai, bad ka jingpeit bniah ïa ki kot ki sla ha ka 21 tarik, katba ka sngi bakhatduh ban weng kyrteng ka dei ha ka 24 tarik mynta u bnai.
Ha kawei pat ka liang, ki bor pynïaid ilekshon ki la nang pynkhreh lypa ïa ka jaka ban ñiew vote na ka bynta ka Sohïong konstitwensi ka ban long ha ka 13 tarik Jymmang.
U CEO u la ïathuh ba katkum ka jingpynbeit, la rai ban pynlong ïa ka jingñiew vote ha ka hall jong ka tnat Arts and Culture ha State Central Library, Shillong.
