Ym pat don ka jingshim rai ha ka CEC ban leit rung sha ka NPP: Banteidor Lyngdoh 

Shillong, Ïaïong 16:

U MLA ka People’s Democratic Front (PDF) u Bah Banteidor Lyngdoh u la ong ba haduh mynta, ym pat don kano kano ka jingshim rai ha ka Central Executive Committee jong ka seng ban leit ïasoh noh bad kano kano ka seng saiñ pyrthei la ka dei bad ka National People’s Party (NPP) ne kano kano ka seng.

U la ong ba kum kine ki kam, khlem da ïoh ban ïakren ne pynbeit kan nym lah ban long kumta.

Bah Banteidor, uba dei u MLA ka Mawkynrew konstitwensi u la ong ba kine kiei kiei kim shym la mih na ki, kum ki trai halor ka jingmih khubor ban ïalong kawei (merge) noh bad ka NPP.

Kumta u la ong ba yn sa shong da ka jingïalang jong ka Central Executive Committee ban ïakren halor kane, bad ynda la dei ka por kaba biang, yn sa paw kiei kiei baroh namar baroh ka shong ha ka jingpynbeit bad jingïakren.

“Ka shong ha ka jingïakren ha ka CEC khnang ba kano kano ka jingthmu kan long na ka bynta ka jingbit jingbiang lang jong baroh,” u la ong.

U la ong ruh bun bha kiba la batai stad ym ithuh ithaw shuh ba kan sa wan ka ilekshon shiteng samoi ha Mawkynrew bad Sohra konstitwensi.

Nangta shuh shuh u la ong ba ka NPP naduh ka sngi ba pynbna ïa ka result ilekshon, ka la khot ïatreilang. Hynrei ma u bad u Bah Gavin M Mylliem, MLA ka Sohra, ki la ïashah bad bat ïa ka kular ba ka seng riewlum kan ïalam ïa ka Sorkar, hynrei kata kam shym la long kumta.

U la ong ba ka PDF ka dei kaba leit khatduh ban ïatreilang ban thaw ïa ka Sorkar MDA-II bad ym dei ba ki kwah shuki ne rhah bor.