Norway, ïaïong:
Ka khubor ba la ioh lum ka iathuh ba ki nongialehkai Fencing na ka ri Norway ki pynpaw ia ka jingbym shym treh ban shim bynta ha kino kino ki lympung ialehkai kiba don lang da ki nongialehkai na Russia bad Belarus.
Kumta na ka liang ka synjuk ba pyniaid ia katei ka jingialehkai na Norway ka Norway’s Fencing Federation ka iathuh ia ka jingiai pynjrong shuh shuh ka jong ka ha ka thup jong ki ri kiba bun kiba pynpaw ia ka jingpyrshah halor ka jingwanphai biang ki nongialehkai jong kitei ki ar ri sha ki lympung ialehkai bapher bapher.
Nalorkata, ka International Fencing Federation (FIE) ha ka 10 tarik jong u bnai ba la dep ka la shim ia ka rai ba khatduh na ka bynta ban shah bad ban ailad biang ia ki nongialehkai Fencing jong kitei ki ar ri ban wanphai biang sha ki lympung ialehkai bar-ri kata ha shuwa ban plie pyrda pat sa ia ka rynsan iakhun na ka bynta ban jied sha ka Olympic ha Paris ka ban sa long ha u snem 2024. Katei ka jingbym shym la treh ban shimbynta da ki nongialehkai katei ka ri ka kynthup ruh ia ka jingkynran-dien noh ka jong ki ban mihkhmat ia ka ri Norway sha ka lympung ialehkai ka ban sa long ha Denmark, Germany bad Poland.
Shuh shuh ruh la bynrap ba katei ka synjuk na Norway ka la weng noh ruh ia ka lympung ialehkai ba shait pynlong shisien shi snem jong katei ka jingialehkai kaba dei ban long ha Oslo. Hynrei kaba lah pynpaw pat ba kan sa iakren bad pynbeit ia kawei ka lympung ialehkai bad ka ri Sweden bad Finland Shabar jong ka FIE World Cup.
Ki nongialehkai na ri Russia bad Belarus ki lah shah khang na ka bynta ban shimbynta ha kiba bun tylli ki lympung ialehkai bar-ri naduh u bnai Lber jong u snem ba lah dep namar ka jingleit ban hiar thma ka ri Russia pyrshah ia ka Ukraine, ha kaba ka ri Moscow ka khot ruh ia kata ka thma ka jong ka da ka “Special Military Operation”.
