Beijing, Iaiong:
Katkum ki khubor la ong ba ka China ka la smai ba kan ym die ia kino kino ruh ki tiar siat ne tiar thma la ka long sha ka Russia ne Ukraine ruh katba ka jing-iakhun thma hapdeng jongki ka dang iaid shakhmat. Katei ka khubor ha kane ka por, ka long hadien ka jingsngewkhia jong ki ri ka thaiñ West ba ka China ka lah ban phah ia ki tiar thma sha ka Russia.
La ong ba ka China, wat la ka la pynpaw ba ka ai jingkyrshan na ka bynta ka Russia ha katei ka jingleit hiar thma jong ka pyrshah ia ka Ukraine, hynrei la ong pat ba ka China kam shym shah liang ne iarap ïano ïano ruh napdeng kitei ki 2 ri kiba ka jingiakhun ka dang neh wat haduh kane ka kynti ba mynta. Kumta ruh la ong ba katei ka rai jong ka China ha kane ka por, ka long ruh hadien ba ki ri na West ki la pynngat kyndon lut ia ka Russia, khnang ba ka Russia kan nym lah shuh ban iadei kam ne ban iadie iathied badki namar ka jing-leit hiar thma ba khlem sangeh ia ka Ukraine.
U Qinn Gang uba long u heh nongialam ba hakhlieh jong ka China, ha kaba u la pynbna ia katei ka jingpynbna kaba khraw ha katei ka sngi halor ka jingbym treh jong ka China ban die ne phah ia ki tiar siat sha baroh ar ri (Russia bad Ukraine) hapdeng ka jing-iakhun thma jong ki.
Kumta, ha katei ka sngi u Qin u la ong ba haba iadei bad ki tiar thma, ka China ka la pyrkhat sani bha bad kam kwah ban die ne phah ia ki tiar siat sha kano kano ruh ka ri hapdeng ka jingiakhun thma jong ka Russia bad Ukraine ha kane ka por.
Pynban, utei u heh u la ong ba ka China ka kloi pynban ba kan ïeng hapdeng jong kitei ki arliang ri, naka bynta ban wanrah ia ka jingiasuk- iasaiñ hapdeng jongki bad ban ialeh ruh ban pynkut no ia katei ka thma. Ha u Rymphang ba la leit, u Secretary of State jong ka United States, u Antony Blinken u la ong ba ki don ki tnat wad bniah jong ka US kiba la ioh ksai ba ka China ka thmu ban phah ia ki tiar siat bad tiar iakhun thma sha ka Russia, bad kumta ruh u la ong ba ka US ka maham pyrshah ia kino kino ruh ki ri ba kim bit ban leit ban iadon bynta bad ka Russia ne ban iadon bynta hapdeng ka jingiakhun thma hapdeng ka Russia bad ka Ukraine namar kane kan ktah bad ap jingma syndon ia baroh ki ri jong ka pyrthei. Kumta ruh ka US ka la maham ia baroh ki ri jong ka pyrthei ba kin ym iashah liang ïano ïano ruh ha katei ka thma.
La ong ruh ba ka jingleit jurip jong u heh ka China-u Xi Jinping sha Russia ha u bnai ba la leit, ka pyni shai ruh ia ka jinglong ba jan bha hapdeng ka China bad Russia namar ka China ka ai jingkyrshan bha ia ka Russia la ka long ha ka ioh ka kot bad ha baroh ki liang.
