Geneva, ïaïong:
Ka United Nations ha ka Sngi Thohdien ka la pyntip bad maham lypa ba kan ym lah ban phah bam sha ki 6,00,000 tam ki phetwir hapoh Chad ha kine ki taiew ki ban wan, katba ka UN kam pat ioh pdiang ia ki pisa noh synñiang ‘Urgent International Fund’.
La ong ba ka World Food Programme jong ka UN ka la iathuh ba ka Chad ka la bun haduh katta ki paid phetwir khamtam ha ki bynta jong ka West bad Central Africa, ha kaba ka jingbun jong ki paid phetwir ka la ktah pat sa ia ka Sudan kaba mar khap.
Namar kata la ong ba ka WFP ka la iathuh ba watla ka kamram jongka ka long ruh shi bynta ban peit bad pynbiang ia ka bam naka bynta ki phetwir, hynrei ha kane ka por ka la pynbna ba kan ym lah shuh ban pynbiang bam ia kat kitei ki paid phetwir kiba bun bah bad kumta ruh ka la pynhiar noh ia ka jingkyrshan na ka 4,55,600 ba ka ju ai jingkyrshan bad bsa bam man ka por, sha ka 2,70,000 naduh une u Iaiong.
Kumta ruh ka WFP ka la ong ba naduh mynta, katei ka tnat kan hap ban peit thuh bha ba tang kito kiba duk tam napdeng kiba duk, kin ioh ia kitei ki lad jingiarap ha kine ki sngi ban wan namar ki jingeh ba ka tnat ka iakynduh ha kine ki por ba mynta.
Namar la ong ba ka WFP kam shym la ioh pdiang pisa synñiang eiei naka bynta u Jymmang shaneng bad kumta ruh ka donkam da kumno-kumno kumba $142.7 Million naka bynta kitei ki 6 bnai ki ban wan, naka bynta ban ioh ban bsa bad phah bam sha baroh kito ki phetwir kiba don ha Chad.
Namar ba ka UN kam shym la ioh pdiang ne ioh lum pisa eiei naka bynta katei ka kam, kumta ruh la ong ba kitei ki phetwir kin kynduh jingeh bad ki lah ruh ban hap shah thngan naduh u Jymmang ban wan.
La ong ba ka Chad ruh ka la mad ia ka jingkyrduh kaba jur bha ha kine ki 4 snem lynter bad ka WFP dalade marwei kam lah shuh ban ai jingkyrshan ia ka Chad ha ka ban bsa ia kitei ki paid phetwir ba bun bah.
La ong ba katei ka ri ka la mad ia ka jingkyrduh bam kaba jur tam eh ha u snem ba la leit, ka jingkyrduh kaba jur tam eh ha kine ki 10 snem mynta.
Ka WFP ka la iathuh ruh ba ki don kumba 1.9 Million ngut ki phetwir ha Chad kiba don hapdeng ka jingkyrduh bam bad kiba ap jingma ruh na ka jingkyrduh bam kaba jur ha kine ki sngi ban wan.
