Kyiv, Iaiong:
U heh ka tnat iada ri jong ka Ukraine ha kane ka por u la ong ba kan pyndonkam lut ia kino kino ruh ki tiar ki bym pat shah khang pyrshah hapdeng ka jingiakhun thma pyrshah ia ka Russia. Kane ka long na ka bynta ban iada ia la u pud-u sam, kynthup ia ka Crimea ba la ioh ban kurup da ka Russia ha ki por ba la leit.
Ka jingkren jong u Oleksiy Danilov ka long hadien ba ka Ukraine ka la iathuh ba ka Russia ka lah ban thombor bad hiar thma jur biang ha kine ki sngi ki ban wan khamtam ha ki thaiñ khappud jong ka phang South bad East ka Ukraine.
Namar ka Ukraine ka la ong ba ka Crimea ka long hi ka bynta jong ka Ukraine bad kumta ruh kan hap ban pyndonkam noh ia ki tiar iakhun kiba kam pat ju pyndonkam baroh shi katta ruh na ka bynta ban iada ia u pud u sam lajong ha kum kane ka por.
