Shillong, Ïaïong 17:
Hadien ba uwei u rangbah ïa uba la tip kyrteng kum u Bah Aiban Dewkhaid, 45 snem ka rta, na ka shnong Kenbah Malai u la noh ïap sha ka riat Dhoi kaba don ha Kenbah Malai jong ka Mawsynram Constituency. Ha ka 10 tarik u Ïaïong, 2023, ka met jong utei u rangbah ka la sahkut ha trai jong katei ka riat. Naduh katei ka sngi ïa katei ka metïap jong utei u rangbah ym pat ïoh ban tam bad dei tat haduh ka Sngi Saitjaiñ ka 15 tarik u Ïaïong 2023 ba ki pulit ki la wan poi ha katei ka shnong ban thang noh ïa katei ka met ha trai riat.
Ha kaba ïadei bad kane ka jingjia, na ka liang u nonglum khubor jong U Nongsaiñ Hima u la ïoh ban ïakren bad u Rangbah Shnong ka Kenbah Malai, u Bah S.K Dewkhaid, u la ïathuh ba dei ha ka sngi Saitjaiñ ka 15 tarik u bnai Ïaïong 2023 ba ki pulit ki la wan poi ha katei ka shnong ha ka por 10 baje mynstep bad ha ka por 10:30 ki la hiar sha katei ka riat bad ki la thang syndon ïa katei ka met ha trai jong ka riat na ka daw ka jingpyut jong ka met.
U la ïathuh ba ïa ka jingpyndep ban thang ïa katei ka met jong utei u rangbah ka dei haduh ka por 12:00 tam eiei mynsngi bad ka jingbym wanrah shuh ïa katei ka met shajrong ka dei namar ba ka la pyut eh.
U Bah S.K Dewkhaid u la ïathuh ba ka jingwan poi jong ki pulit sha katei ka shnong ban tan ïa katei ka met ka dei hadien ba la ai jingtip da ki trai jong ka Kur ba la pyntip lyngba u Officer in Charge (OC) bad u Block Development Officer (BDO) ha ryngkat ka jing phone ruh ïa ki heh pulit.
