Taipei, ïaïong:
Ka tnat shipai duriaw jong ka US ha ka Lah Sngi U Blei, ka la pyntip ba ka jhad thma USS Milius ka la iaid lyngba ia ka Taiwan Strait ha ka Sngi U Blei. Hynrei, la ong ba kane ka long tang ka jingiaid lynti jong katei ka jhad bad ka leit jia ryngkhat ruh ha katei ka sngi tang hadien ka jingsangeh jong ka jingkilan jong ki tnat shipai ka China ha ki khyndiat sngi ba la leit.
Kumba la ju tip, ba ka China ka kheiñ ia ka Taiwan kum la ka jong ka bynta bad ka kam ruh ba ka Taiwan ka dang hap hi hapoh u pud- u sam jongka bad kumta ruh ka la pynlong ia ka jingkilan ba 3 sngi ha kylleng sawdong jong ka Taiwan naduh ka Lah Sngi U Blei jong ka taiew ba la lah bad kaba ka la pynkut noh dang ha kine ki khyndiat sngi ba la leit.
Namar la ioh jingtip ruh ba ka China ka la pynlong ia katei ka jingkilan ha kylleng sawdong jong ka Taiwan, kum shi bynta ban pynpaw ia ka jingbitar jongka halor ka jingkynduh jong ki nongialam katei ka ri dew lynnong bad ki heh ka United States ha ki khyndiat por ba la leit.
Bad na ka liang jong ka China, ka la maham ba kan nym ailad ia ki bor ba nabar ba kin leit ban iadon bynta ne ban iadei kam bad katei ka Taiwan namar ka China ka kam bad pynskhem ruh ba katei ka dew lynnong ka dei hok ka bynta jongka.
