Shillong, Ïaïong 17:
Ka Synjuk ki Waheh Shnong Jowai ha ka Lah Sngi U Blei ki la pynpaw hakhmat ka Meghalaya High Court ba ka jinglum ïa ki ñiut ki ñier na Jowai da ka Jowai Municipal Board (JMB) ka long tang katto katne sien ha ka shi bnai ha ka jaka shi taïew. Hynrei ka JMB ka la pynpaw ba ka la kham pynbha ïa ka rukom lum ïa ki ñiut ki ñier.
Na ka liang ka High Court ka la ong ba ka paw ba ka JMB bad ka sorkar jylla kim patiaw satia ïa ki nongshong shnong ka Jowai.
Ha kajuh ka por, ka High Court ka la ong ba namar ka JMB ka la kam ba ka la pyntreikam kham bha ïa ka jinglum ïa ki ñiut, ka JMB ka dei ban pyni sha ka ïingbishar ïa ka jingbuh ïa ki sngi ba ka lum ñiut. Ka JMB ka dei ruh ban pyni ha kino ki dong la buh ïa ki trok ban kit ïa ki ñiut, ki nombor jong ki trok bad haduh katno por ki trok ki ïeng ha ki dong ban lum ïa ki ñiut.
Nalorkata, ka JMB ka dei ban ai ïa ka ‘map’ jong ka sor Jowai bad ban pyni ba ka jingkit ïa ki ñiut ka long ha baroh kawei ka sor ne em. Ha kajuh ka por ka dei ban pyni ha kano ka rukom la bret ïa ka ñiut ka ñier katba ka jingshna ïa ka karkhana ban lum ñiut ka dang ïaid.
