C. B. Iawphniaw
Nga shu iohsngew tip ka dei ne ka lait ba ka ktien Hindi ka la ioh jingithuh hapoh U. N. O. Lada ha U. N. O, la lah ban kren da ka Hindi, te kan eh aiu ban kren Hindi ha Meghalaya Assembly, namar ka Meghalaya ka dei ka Jylla kaba hap hapoh ka Ri India. Kino kino ki ktien tynrai ka ri India lah ban kren ha kino kino ki Jylla ka ri India. Kane ym dei ba nga ia shah bad ai jingiaroh ia ka jingkren u Lat ka Jylla ha ka Hindi hapoh Assembly. Namar lada uno uno u briew u kren da kano kano ka jait ktien ka ri India hapoh ri India lah beit ban kren ym dei ban niew bein ia ka jingkren jongno jongno. Ngi hap ban pdiang bad pynkylla sha ka jait ktien ba kren ki briew ka Jylla. Kam dei ban ialeh politic ia ka ktien ba kren ki nongshong shnong ka ri India. Ki Maram kin kren maram, ki Sohra kin kren sohra, ki Pnar kin kren ia ka ktien pnar. Ym dei ban sngew phylla ia ka jingkren ha la ka jong ka jong ka jait ktien. Ka jingwoh nia ia ka jingkren u Lat kam long kaba bha ia ka Jylla. Namar kam dei ka rukom ban kren tang ka English ha ka U. N. O. ruh. Ki German kin kren da ka ktien German. Ki French kin kren da ka ktien French. Ki Italian kin kren da ka ktien Italian. Ka China kan kren da ka ktien China. Ka Russia kan kren da ka ktien Russia. Ka Japanese kan kren da ka ktien Japanese jong ki. Bun ki ri bapher bapher kin kren da ia ka jong ka ktien tynrai jong ki. Kane ka long ka jingiohi ba ki la kren bad kawang ktieh hapoh Assembly tang ba kren Hindi u Lat. Ym donkam ban woh nia ia ka jingkren u Lat. Namar ka Jylla jongngi ka dei ka Jylla ba kren da ka ktien Khasi – Jaintia bad ka ktien Garo, ym dei ba kren da ka English ha baroh ka Jylla.
