Shillong, Ïaïong 17:
Ka Voice of the People Party (VPP) ha ka Lah Sngi U Blei ka la pynsngew sha ka Sorkar Jylla ban thaw noh da ka komiti kaba kyrpang ka ban kynthup ïa ki nongïalam na Ri-lum Khasi-Jaiñtia bad Ri-Lum Garo nalor ki ’riewshemphang ban khmih bniah ïa ka bhah thung kam ne ka ‘Reservation Policy’.
“Ngi wan ha kane ka jingïalang ban pynshai paidbah ïa ka jingthmu jong ngi ban ïaid nangne shakhmat haba ïadei bad ka jingpyntreikam ïa ka ‘Roster System’,” la ong u President ka VPP, bad MLA ka Nongkrem, Bah Ardent M. Basaïawmoit haba kren ha ka jingïalang pynshai paidbah ha Madan Heh, Mawlai Phudmuri halor ka ‘Roster System’ bad ka bhah thung kam.
Haba pynkynmaw ba ka seng ka la pyrshang katba lah ban ïakren ïa katei ka mat hapoh ïingdorbar, u la ong ba kum ka liang pyrshah, ki la shah khñiot bad ym shym la ai por ïa ki ban ïakren ïa ki mat kiba ktah ïa ka ri bad ka jaidbynriew.
“Ngi la ong ba lada ka Sorkar kam shim ïa ka sienjam ban pynsangeh shuwa ïa ka jingpyntreikam ïa ka ‘Roster System’ kat bym pat pynbit pynbiang shuwa ïa ka ‘Reservation Policy’, ngin hap ban mih surok bad kane ka dei ka sngi kaba ngi sdang ïa kane,” la ong u Bah Basaïawmoit.
Haba kdew ba ki don katto-katne kiba pyrshang ban pynsngewthuh bakla ïa ki paidbah ba ka VPP ka pyrshang wanrah jingsngewpher jaidbynriew, u President u la pynshai ba ka seng haba ka rah ïa katei ka mat hapoh ïingdorbar kam don satia kano-kano ka jingpyrkhat ban bishni, isih ne shun ïa kiwei pat ki para jaidbynriew kiba shong ba sah ha ka Jylla.
“Hadien ba ngi sngewthuh ba ka jingpyntreikam ïa ka ‘Roster System’ kaba ki sdang naduh u 1972 kan ktah jur ïa ki samla wad kam wad jam, ngi la rai ban kynthup ïa ka ha ki mat ilekshon jong ka seng. Ngi la rah ha ïingdorbar, ngi la pynsngew, ngi la kren ba ka Sorkar ka donkam ban pynsangeh noh shuwa ïa ka jingpyntreikam ïa ka ‘Roster System’,” u la ong.
Haba ïathuh ba don bun bah ki samla kiba khuslai jingmut bad duh jingkyrmen, u MLA u la ong ba kum ki nongïalam ba don ka jingkitkhlieh kim lah ban shu peit bad kumta ki la shim ka rai ban ïakren bad ka Sorkar halor katei ka bynta.
“Ka VPP kam shym la shim ïa ka sienjam ban hukum ïa ka Sorkar…leh kumne, leh kumtai, mang katta ïa uta…em, ngim shym la shim ïa kane ka sienjam. Hynrei ngi ong ba ngi kwah ba kan don ka jingshimkhia na ka liang ka Sorkar bad lada ka sngap ïa ka jingai jingmut, kata ka dei ban thaw da ka komiti kaba kyrpang ka ban kynthup ïa ki nongïalam na ki ar jaidbynriew ryngkat ki ’riewshemphang ki ban ïatai bad peit hangno ki jingdkoh ki don khnang ba kata ka ‘Reservation Policy’ kan ym long kaba noh shiliang,” la ong u Bah Basaïawmoit.
Haba kren halor ka ‘Reservation Policy’, utei u nongïalam u la ong ba katei ka bhah thung kam, kam long katkum ka jingbun paid ka jaidbynriew.
“Ngi kham bun ma ngi ban ïa kine ki para jong ngi. Dei na kata ka daw donkam ban pynbeit bad khmih ïa kane ka ‘Reservation Policy’. Ka don ka jingdkoh, kam don ka bhah ïa ki para jong ngi kiba don jingduna ha ki dkhot met bad kito kiba duna ha ka ïoh ka kot,” u la ong.
Haba pan jingkyrshan na u paidbah halor kane ka bynta, u la ong ba ka VPP ka don ban lamkhmat ïa ka jaidbynriew ban ïakhun ïa katei ka jingeh bad lada u paidbah ha baroh kawei ka Ri-Khasi u mih, ka Sorkar kan hap sngap ïa ka jingdawa.
Ha kajuh ka por, haba ai khublei ïa ki kynhun seng bapher-bapher kiba la ai jingkyrshan ïa ka VPP ban ïakhun ïa kane ka mat kaba ktah ïa ka jaidbynriew, u Bah Basaïawmoit ha kawei ka liang u la ong ba ki don pat ki kynhun seng kiba pynmih khubor ban pynsngewthuh bakla ïa ki paidbah da kaba ong ba katei ka jingleh ka VPP kan wanrah pynban ïa ka jingduhnong.
“Kum ki nongïalam ha shuwa ba ngin rai ban kynthup ïa kane ha ka mat ilekshon, ngi la da ïathir-ïatai, ngi la da ïa ngam…ym dei ka rai ba ngin shu pynbiej paidbah. Kan jyn da la bha ïa kito ki 2 tylli ki seng kiba la kynthoh ba kin ïakynduh shuwa ïa ki nongïalam bad ngin sa batai,” u la ong.
Shuh shuh haba bynrap ba ka Sorkar kam dei ban kheiñ sting ïa ka jingïaleh jong ka seng, u President u la kren da kaba shai ba “kane ka jingïaleh jong ngi kam dei ka jingïaleh jaidbynriew. Ka jingïaleh jong ngi ka long pyrshah ïa ka Sorkar bad ïa kane ka mat treikam kaba la sahdien…51 snem la ïaid, shibun ki jingdkoh.”
