Beijing, ïaïong:
U President jong ka Brazil ha ka Sngi Saitjaiñ u la ong ba ka United States ka dei ban sangeh noh ka jingai mynsiem ia ka thma ha Ukraine. Ia kane u la kren ha ka por ka jingleit jurip jong u sha China ha kaba u la leit ban pynskhem ia ka jingiadei hapdeng ka China bad Brazil haba iadei bad ka kam khaii pateng.
La ong ba katei ka jing-leit jurip jong u Luiz Inacio Lula da Silva ka long ban pyni ba ka Brazil ka la wan phai biang ban iatrei lang bad ka China bad kan ym ailad ruh ia ki ri South America ba kin pyniajan bad ka China ha ka jaka jong ka.
Kumta ruh u Lula ha ka Sngi Saitjaiñ u la leit ruh sha United Arab Emirates naka bynta ka jingleit jurip ba shi sngi bad u la leit ruh ban kynduh ia u heh katei ka ri- u Sheikh Mohamed bin Zayed Al-Nahyan.
Namar kata la ong ba utei u nongialam ka Brazil u la ong ba ka United States ka donkam ban sangeh noh ia ka jingai jingkyrshan ia ka Ukraine hapdeng ka jingiakhun thma jongka bad ka Russia, hynrei u la ong ba ka US ka dei pynban ba kan wanrah ia ka jingiabeit bad ka jingiasuk- iasaiñ hapdeng jong kitei ki arliang ri kiba la ia kynad mynta la shi snem tam. Ha kajuh ka por ruh la ong ba ka European Union ka donkam ban sdang noh da ka jingiakren ïasuk.
Da katei ka rukom, la ong ba ka European Commission ka lah ruh ban lah pynkohnguh ia u President ka Russia u Vladimir Putin bad ia u President ka Ukraine u Volodymyr Zelensky ba kin sangeh noh ia ka jingïakynad bad ba kin ïakren ïasuk noh kumba ju long baroh shi katta ha ki snem ba la leit noh.
U Lula, uba la wanphai biang sha ka bor ha u Kyllalyngkot hadien ba u la bat ia ka shuki nongialam la 2 samoi hapdeng ki snem 2003 bad 2010, ha ka Sngi Thohdieng u la leit ban kynduh markhmat ia utei u nongialam ka China u Xi Jinping naka bynta ban pynskhem ia ka jingiadei ha ka liang iadie- iathied bad ha ki liang baroh hapdeng ka Brazil bad ka China ha kine ki sngi ban dang wan.
