Shillong, Ïaïong 17:
Hynñiew tylli ki kolej na ka nongbah ki la poi ban ïashim bynta sha ka lympung ïalehkai basketball ba la tip kum ka Seng Khasi College Invitational Basketball (Girls) Competition kaba la long ha madan ïalehkai basketball jong kane ka kolej ha Weiking, Jaïaw, Shillong.
Ïa kane ka jingïakob la sdang ha ka Lah Sngi U Blei da ka jingplie na u Principal ka Seng Khasi College u Bah W.B Rynjah.
Ki kolej kiba la wan ban ïashim bynta ki long ka Seng Khasi College, St Edmunds College, St. Mary’s College, Shillong Commerce, Synod College, St. Anthony’s College bad ka Lady Keane College.
Haba kren kum u kongsan, na ka liang u Bah W.B Rynjah, u la ong ba ka jingpynlong ïa kane ka lympung ka long kum shi bynta ka jingrakhe ka Seng Khasi College ïa ka jubili ksiar (golden jubilee) ha kaba kum ka kolej ka la shim ïa ka sien jam ba kan pynlong ïa kiba bun bah ki prokram.
Nalor katta u Principal um lah ban khlem da ai khublei ïa ki Principal jong ki kolej kiba la pdiang ïa kane ka jingwer ban ïashim bynta ka Seng Khasi College sha kane ka lympung ïalehkai basketball ïa ki khynnah kynthei, namar lymda kloi ban ïashim bynta lang jong ki, lehse ka jingpynlong ïa kane ka jingïakob kan nym long kaba jop.
Haba phai sha ki samla ba ïalehkai, u Principal u la kyntu ïa ki samla pule ba kin ïakhun tyngeh bad kynmaw ba dei ban don ka mynsiem ban burom ïa ka jingïalehkai. U la ai syndon da ka nuksa ba haduh katno u dap bad shlei ka mynsiem haba u shem bad ïohi ba u khun jong uwei na ki khlur ïalehkai bna nam ïa ka kriket ka India u Sachin Tendulkar, u Arjun Tendulkar, uba la ïoh ban ïalehkai ha ka lympung ka Indian Premier League Cricket da kaba mihkhmat ïa ka kynhun ïalehkai ka Mumbai Indians.
Hangne u Principal u la ïeng ban pynkynmaw ïa ki khynnah nongwan ïashim bynta sha kane ka lympung ïalehkai ïa ki kyntien phira bad kyntu kynpham ba u Sachin u la ai ha la u jong u khun ‘give the game the respect it deserves and the game will love you back’.
Haba phai sha kane ka jingïakhun jong kane ka sngi sdang, ka Seng Khasi College ka la lah ba kan pynliem ïa ka Shillong Commerce College da 30-11, ka St. Edmund’s College ka la lah ban pynliem noh ïa ka Synod College da 26-14, katba ka St. Mary’s College ka la lah ban pynliem ïa ka Lady Keane College da 17-9.
Ki jingïakhun ha ka Sngi Ba-ar kin long hapdeng ka St. Anthony’s College pyrshah ïa ka St. Mary’s College bad ka Seng Khasi College ïa ka St Edmund’s College. Ïa ka final jong kane ka lympung ïalehkai la buh ban pynlong ha ka Sngi Balang (19 tarik).
