Jowai, Ïaïong 17:
Lada nang slem ka jingpynbeit pud pynbeit sam hapdeng ka Assam bad Meghalaya ha ka thaiñ Khanduli, Khatkasla-Psiar bad Block 1, lehse kan sa wallam ïa ki jingjia sngewsih bad sngew shyrkhei namar ba ki nongshong shnong ha kine ki thaiñ ki la pynpaw ïa ka jingngiah bad kdang ban shu ïai ap shi ïai ap. Kane ka jinglap ngiah bad kdang la pynpaw da ki nongshong shnong ka Khanduli kiba la shim ha la ki kti ban pynpra ïa ka ‘signboard’ ba la sieh jubor da ka Karbi Anglong Autonomous Council (KAAC) hapoh u pud u sam jong ka Dorbar Shnong Khanduli.
Ka Karbi Anglong Autonomous Council (KAAC) ka la sieh jubor ïa ka ‘signboard’ na bynta ban khrong khajna na ki kali kit mar rep jong ki nongshong shnong ka Khanduli.
Haba ïakren bad u Waheh Shnong u Bah Yooshida Nongspung, u la ïathuh ba ïa kane ka ‘signboard’ la antad ba la wan sieh ha ka miet 15 tarik une u bnai.
U la ong mar sien ïohi ïa kane ka ‘signboard’ u la pyntip wut-wut sha ki bor pynïaid district. Na ka liang ki bor pynïaid district hapoh ka jingïalam u Magistrate u Bah M.A. Challam, u DSP u AJ. Sangma ryngkat ka kynhun pulit, ha ka Lah Sngi U Blei ki la hiar sha kane jaka ban pynjai jai ïa ki paidbah kiba la bitar lep ïa ka jingleh jong ka KAAC.
U la ïathuh ba ki nongshong shnong kiba la bitar ïa kane ka jingleh bor jong ka KAAC kim sngap shuh ïa ka jingkren jong ki bor district bad ki la leit ban pynpra ïa katei ka signboard ha ka por 3 baje janmiet jong kane ka sngi bad ki briew ka Assam ruh ki la mih ban pyrshah.
Hangne ka la mih ka jingïapyni bor bad ka thma ktien kaba jur hapdeng ki nongshong shnong ka Assam bad ka Meghalaya.
Hadien pat la lah ban tem noh ïa ka jingïakajia bad kam shym la don kano kano ka jingjia ba sngewsih hapdeng ki arliang mamla.
Ha kane ka jingpynpra ne jynrat ïa katei ka ‘signboard’ la sakhi ba baroh arliang ki bor synshar district jong ka West Jaiñtia Hills District bad ka West Karbi Anglong District ki la don lang ha katei ka jaka.
