Mawkyrwat, Ïaïong 17:
Ka long ka khubor kaba sngew myllung bad sngew sangsot ïa kawei ka longïing kaba don hapdeng ka jingeh bad jingkyrduh ha kaba ka kmie bad ki khun bunsien tang ïa ka ja ban bam ruh kim ïoh.
Kane ka longïing ka dei jong ka Kong Kostina Turnia, 36 snem bad ka don 8 ngut ki khun na ka shnong Mawlar, ka lynti ban leit sha shnong Ngunraw kaba hap hapoh Mawkyrwat Block, South West Khasi Hills District.
Haba la ïoh jingtip halor kane, u nonglum khubor jong U Nongsain Hima, u la leit ban ïakynduh ïa kane ka longïing. Haba ïakren bad ka Kong Kostina Turnia ka la ïathuh ba naduh ba la khlad noh u kpa ka ïing mynta la kumba lai bnai eiei namar ka jingshitom ha kaba u la ieh khunswet noh ïa ka lem bad 8 ngut ki khun kynthup ïa i khun ba dang 3 bnai. Kum ka ïing ka sem ka la don hapdeng ka jingduk bad jingkyrduh haduh katta katta.
Ka la ïathuh ruh ba u kpa shwa ba un khlad um shym la lah ban ïohi ïa la i jong i khun ba dang shu kha namar ha ka por ba i dang dap tang shitaïew ka jingshitom ka la ban jur bad u la khlad noh ha NEIGRIHMS Hospital, Shillong.
Nalor kata, katkum ka jingïathuh jong katei ka longkmie, kaba kham sngew Myllung shuh shuh ka long ba i khun ba hynñiew ba dang 4 snem ka rta i don hapdeng ka jingshitom.
Nangta ka la ïathuh ruh ba naduh ba khlad u kpa ki khun, kum ka ’riew kynthei ka shem shitom shibun ban pyndap ïa ka bam ka dih ha ïing ha sem.
Ka la ïathuh ruh ba bunsien ha ka jinglong duk jinglong raitoi wat tang ïa u khaw ban thied ruh kam ïoh bad bunsien ma ka bad ki khun ki hap ban shah thngan namar ki khun ki dangrit kim pat nang ban bylla bad ïalade ruh ka hap ban ri ban sumar bad ai buiñ ïa i khyllung ba dangrit.
Shuh shuh ka la ïathuh ruh ba wat la ki ïoh ïa u khaw rashon ba 25 kilo man la u bnai, hynrei namar ba ki khun ki la bun, une u khaw um lah ban pyndap baroh shi bnai. Hynrei tang shitaïew u la lut bad ka la ïathuh ruh ba dei ki marjan marpa kiba ju ïarap ïa ka ha ka por ba kim don eiei shuh ha ïing.
