Warsaw, ïaïong:
Uwei na ki nongshut bol ba tbit bad kynsai jong ka kynhun ialehkai phutbol ba mynta ka FC Barcelona u Robert Lewandowski, u la pynpaw paidbah ia ka jingkwah eh ka jong u mynta ba u khlur ialehkai barim jong katei ka klob u Lionel Messi un wanphai biang noh sha ka kynhun ialehkai baroh kawei ha ka aiom ialehkai ka ban wan.
Katkum ka khubor ba la pyllait da ki lad pathai khubor ka ri Spain ki iathuh ba katei ka klob ka dang ialeh mynta ban ioh iasoi biang sa shisien bad utei u khlur pynkhih jar jong ka uba la ialehkai mynta na Paris Saint-Germain naduh u snem 2021. U Messi ruh kumjuh u da thrang hir-hir mynta ban wanphai biang sha ka klob ialehkai ha Camp Nou.
Kumta ruh na ka liang jong u Lewandowski u pynpaw ia ka jingkyrmen kaba skhem ba un sa ioh ban ialehkai lang bad u Messi na katei kajuh ka klob naduh ka aiom ialehkai ka ban wan.
Kumba la paw mynta ka long ba ka klob FC Barcelona ka don ha ka lynti iaid ka jong ka na ka bynta ban khur biang shalade ia ka trophy jingjop na ka Spanish La Liga; naba ka don mynta ia ki 13 dor-thong jong ka halor ka Real Madrid hadien ba ka lah dep ban ialehkai ha ki 28 tylli ki jingialehkai.
Shuh shuh ka khubor ka iathuh ruh ba ka Barcelona kam shym la khur shuh ia ka trophy jingjop na ka lympung ha ki khyndiat snem ba lah leit noh, hynrei mynta ka don ha ka jaka kaba biang tam eh na ka bynta ban shim ia ka sienjam ha ka ban khur shalade ia ka jingjop.
Ha kane ka aiom ialehkai ba mynta jong ka La Liga, u Robert Lewandowski u long uwei na ki nongialehkai ka kynhun uba lah hakhliehduheh ha ka jinglah ban kamai bun kol eh kata da 17 kol.
