Shillong, Ïaïong 17:
U President ka Voice of the People Party (VPP) u Bah Ardent M Basaïawmoit u la ther tyngeh ïa ka Sorkar Meghalaya Democratic Alliance (MDA-2) halor ka jingthung Chairman, Adviser da ki briew ba la rem ha ka ilekshon, wat la ka jylla ka don hapdeng ka jinghiran pisa.
U Bah Ardent u la ther ïa kane ka bynta ha ka jingïalang pynshai paidbah ka VPP ha kaba ïadei bad ka Reservation Policy bad Roster System ba la pynlong ha madan Heh, Mawlai Phudmuri ha ka Lah Sngi U Blei.
“Ngi ïohi kumno ki thung Chairman, Adviser ha kine ki sngi da kita kiba la shah rem noh ha ka ilekshon. Katne ka jingkyrduh kam ki samla, nalor u Adviser, don sa u Chief Adviser jong u Myntri Rangbah ka jylla u Conrad K Sangma, bad nga tharai tang ha ki khyndiat sngi yn sa thung sa da u Super Chief Adviser jong u Myntri Rangbah,” la ther tyngeh u Bah Ardent bad bynrap ba lada u Myntri Rangbah u dang donkam ïa ki nongaibuit ne ki adviser khamtam da ki briew ba la rem ilekshon, ka mut ym pat long uba biang ban long u Myntri Rangbah.
Nalor kata, u Bah Ardent u la ong, “Ym tang kine, la sakhi ruh ba la thung Consultant da ki spah ngut. Ha ka jingkylli ba nga la buh hapoh ïingdorbar, la pynpaw ba ki don haduh 160 ngut ki consultant ba la thung bad ka jingsiew ka la kot sha ka T.250 klur.”
“Mutdur ma phi ki paidbah, ka jingbam duh, ka ri ka nang swai, ka kam ka jam ym don, u nongrep u shah ieh beiñ, ki nonghikai ki shah ieh beiñ, bun ki bym ïoh tulop, ka MCCL kan khyllem noh, ka MeECL ruh katno ka lah ban im. Kumta lymda u paidbah un sngewthuh ban hap ban leh eiei, lem kumta ngi la ngam lut,” la ong biang u Bah Ardent.
Nalor nangta, u Bah Ardent u la ong ba ka VPP ka dawa na ka Sorkar ba ka dei ban sangeh noh ka thung Chairman, Consultant. Hooid, lehse ki lah ban thung kawei ar na ki kompeni kiba paw ïa kaba ym lah ban khang, hynrei kumba ka long mynta la thung da ki ’riew shimet bad don lei ki IAS ophisar kiba wanrah ïa ki lok jong ki ruh hangne ban long kita ki consultant. Hato yn shu hun seh ban shu peit kai, bad ka VPP ka sngew ba lada ailad beit ïa kane ka sorkar ban leh mon kumne haduh u 2028 ym tip shuh lah ne em ban khyllie hadien kata, la bynrap shuh shuh u Bah Ardent.
