Shillong, Ïaïong 17:
U Myntri Rangbah u Conrad K Sangma u la ong ba ka jingïalang ban ïatai halor ka Roster System kan sdang shwa da ka jingïatai kaba hapoh jong ka Sorkar da kaba khmih bniah ïa ki kot ki sla bad ruh ki hukum ka Ïingbishar.
U Conrad u la ïathuh ïa kane haba ïakren bad ki lad pathai khubor hadien ka jingïalang G20 ha Courtyard by Marriott Hotel ha ka Lah Sngi U Blei.
U Myntri Rangbah u kubur ba kane ka mat ka long kaba jyrwit-jyrwat bad kaba khluit, hynrei ka Sorkar ka kwah ban shim lang ïa baroh naduh ki jingpynsngew bad ki jingai jingmut kumno ban ïaid haba ïadei bad kane ka mat.
U la ong ba ka mat kaba dei shaphang ka bhah ym lah ban len ka dei kaba khluit bad baroh ki nongshong shnong ki don ka hok ban pynpaw bad kaba donkam ka long ban ïatai bad ïakren bad baroh kiba donbynta lang ha ka Jylla khnang ba kano kano kaba ïatai bad shim rai kan long kaba myntoi bad kaba bha ïa ka Jylla bad ïa ki nongshong shnong.
U la ai nuksa ba ha Karnataka ruh ka mat kaba dei shaphang ka bhah ka dei kaba mih jingïakren bha bad ym dei tang ha Meghalaya ba kum kane ka mat ka mih ban ïakren.
Kumta u la ong ba ha kane ka taïew ka Sorkar kan lum ïa ka jingïalang ban ïakren sani da kaba peitbniah ki kot ki sla nalor ki hukum kiba wan na ka Ïingbishar. Bad hadien kane, yn lum sa ïa ka jingïalang jong ki seng saiñ pyrthei bapher bapher ban ïakren ïa kane ka kam.
Lah ban pynkynmaw ba ka Voice of the People Party ka la pynpaw ba ka kwah ban ktah ïa ka bhah thungkam (reservation policy) ban pynbeit ïa ki jingduna, bad ka la kren shai ba kam pyrshah satia ïa ka ‘roster system.’
Hynrei ki don kiwei pat ki seng kiba la pynpaw ba ïa ka bhah thung kam (reservation policy) ym dei satia ban ktah namar ïoh ba ka wanrah pynban ka jingmynsaw, hynrei dei ban kren shwa tang ïa ka ‘roster system’ khnang ba ka jingpyntreikam ïa ka roster system kam dei ban phai shadien hynrei ka dei ban pyntreikam shakhmat.
