Bengaluru, ïaïong:
Hadien ka jingdep ban ialehkai ha ka lympung ialehkai Kriket ka Indian Premier League (IPL) hapdeng ka Royal Challengers Bangalore (RCB) bad ka Chennai Super Kings (CSK), ka khubor ka iathuh ba u khlur ialehkai jong ka RCB u Virat Kohli u lah shah dain kuna da 10% na ka jingsiew ba u ioh. Kane ka wan hadien ba na ka liang ka Advisory ba la pynmih hukum da ka Board for Cricket Control in India (BCCI) ka la lap ba utei u rangialehkai u lah pynkhein ia ki kyndon jong ka CoC (Code of Conduct) jong katei ka lympung ialehkai. Kane ka wan jia ruh hadien ba ka RCB ka lah ngam noh sha ka jyrsieh jong ka jingshah pynrem da 8 ron ha ka jingiakhun pyrshah bad katei ka kynhun ialehkai kaba lah rah ia ka nam lahduh haduh saw sien na ka lympung.
Kumta ha kaba iadei bad katei ka bynta, na ka liang jong u Kohli u la pdiang ia ka Level 1 jong ka jingpynkheinkyndon kaba hapoh ka Article 2.2 jong ka CoC. Hynrei na ka liang jong ka Advisory kam shym la batai bniah ha kaba iadei bad ka jingdain kuna.
Kumta ka jingdain kuna pyrshah ia utei u rangialehkai ka long halor ka jinglehkmen palat pud ia ki kyndon ba la buh hadien ka jinglah ban pynhap wiket ia u nongtied ba pawkhmat ka CSK u Shivam Dube; wat la u Dube u la pynsted ka rukom ialehkai ka jong u da ka jinglah ban tied ia ki 52 ron na ki 26 bol bad uba lah shah pynhap wiket noh ha u rangkawang bol ka RCB u Wayne Parnell.
Katei kajuh jingdain kuna lah pynhap ruh sha u nongkawang bol spin ka Mumbai Indians u Hrithik Shokeen hadien ki jingleh kmen ki jong u bad ha kajuh ka por ruh ka jingpynmih ia ka thma-ktien hapdeng jong u bad u kapten jong ka KKR (Kolkata Knight Riders) u Nitish Rana.
