Jowai, Ïaïong 18:
Hadien ka jingwan buhai shnong kumba artaïew tam ha Lad Demthring, West Jaiñtia Hills District, ki kynhun jong ki sim Pukni kyndit-kynsan ki la wan buhai ha ki dukan die doh kiba don harud surok bah Amlarem-Dawki Road namar ba trei ka jingthngan.
Kane ka jinghiar kine ki Pukni kiba tip ha ka ktien nongwei kum ki Himalayan Vulture (Gyps himalayensis) ka long thik kumba hiar thma namar ki her da ka kynhun ban ñiom ïa ki dukan die doh kaba don ha katei ka jaka.
Kine ki sim ki la wan boi ha ka surok ne ka lad ban leit sha ka shnong Demthring, ka shnong kaba jngai tang katto katne kilometre na Jowai kaba don sha shiliang ka Wah Myntdu mynta la artaïew tam.
Kane ka jingwan boi kine ki sim ha kane ka jaka ka dei ka sien ba ar bad kane ka jaka ka dei kaba don ïa ki sem ot doh.
Ka jingdon kine ki Pukni ha katei ka jaka ka la khring ïa kiba bun ban leit jngoh ïa ki khamtam ki nongwan shangkai suwari na bar ka Jylla ban hiar ha katei ka jaka ban shondur ringdur bad ai bam ïa ki.
Ha kine ki khyndiat sngi namar ba biang ka bam ka dih, kine ki sim kim shym la tur sha ki dukan, hynrei ha ka 18 tarik ki la tur sha ki dukan ban rong ïa ki doh ba die ha ki dukan.
Kine ki sim ki don haduh 38 tylli bad na ka liang ka tnat khlaw ruh ka la ai jingïada ïa ki.
Kumta ka tnat khlaw ka kyntu ïa iwei pa iwei ban ai ka jingïada ïa kine ki sim namar ki dei ki sim kiba la jan duhjait katkum International Union for Conservation of Nature (IUCN) Red List Threatened Species.
