Jowai, Ïaiong 18:
Tang hapoh khyndiat kynta hadien ka jingshah pynpra ne jynrat jong ka signboard ha ki nongshong shnong Khanduli, ki bor pynïaid jong ka Karbi Anglong Autonomous Council (KAAC) ki la wan sieh biang ïa ka Signboard ha kajuh ka jaka ban pynksan ïalade.
Kane ka jingleh jong ka KAAC ka la pynbitar lep ïa ki nongïalam jong ka Dorbar Shnong Khanduli lem bad ki nongshong shnong kiba la byrngem byrsit ban leit hiar biang dalade ban weng ïa katei ka signboard lada ki bor pynïaid District jong ka West Jaiñtia Hills kim lah ban weng mardor ïa katei ka signboard.
Ïa kane la pynpaw da ki nongïalam Shnong Khanduli kiba kynthup ïa u Waheh Shnong u Bah Yooshida Nongspung, u Chairman Shnong u Bah Niwal Challam, u Assistant Waheh Shnong Bah K. Bina bad u Secretary Shnong Bah Helpme Slong ha ka jingïakynduh ïa u Additional Deputy Commissioner (ADC) West Jaiñtia Hills District u M. A. Challam ban aiti ïa ka dorkhas ha kamra treikam jong u ha ka Sngi Ba-ar.
Ha ka jingïakynduh ïa u ADC, ki nongïalam shnong ki kyrpad ruh ban weng ïa ka jingshong beaiñ jong ki Assam Battalion hapoh shnong Khanduli namar kane ka jaka ka dang dei jong ka Dorbar Shnong Khanduli.
Nalorkata, ki la ong ka jingdon ki Battallion jong ka Assam ka pyntieng pynsmiej ïa ki nongshong shnong khamtam ïa ka leit ka wan ki kynthei khynnah.
Haba kren bad ki lad pathai khubor, u Chairman Shnong u Bah Niwal Challam u la ong, “Ka hok jong ngi shi tda ngin ym ai sha ki, ka hok jong ki shi tda ngin ym treh da lei-lei ruh, bad ngin ym hun lada kim kynriah shi syndon ïa kato ka khyrdop khrong khajna jong ki.”
U Assistant Waheh Shnong Bah K. Bina u la ong, “Ngim kynnoh ïa baroh ki paid Karbi hynrei ki don katto katne ngut ki nongïalam jong ki Karbi kiba kwah ban pynsniew dur ïa ka imlang sahlang.”
U la ong ki nong Karbi ki tip shai ba ka jaka kaba ki wan sieh Signboard ka dei ka jaka kaba hap hapoh ka jingpeit jingkhmih jong ka Dorbar Shnong Khanduli bad ki wan sieh ïa katei ka signboard khlem ka jingkynjoh ktien na ka Dorbar Shnong.
Shuh shuh u la ong, ki nongshong shnong Khanduli kim juh nud ban leh eiei ha ki jaka ba dei khmih da ki nong Karbi hynrei ki nong Karbi pat halor ba ki la tip shai ba kane ka jaka ka hap hapoh ka jingpeit jingkhmih jong ka Shnong Khanduli hynrei ki shlan ban kyntur bad ïalam ïa ki heh sorkar jong ki hapoh u pud u sam ka Dorbar Shnong Khanduli.
U la ong lada ki ïoh ban buh ïa ka khyrdop khrong khajna ha shnong Khanduli, kan buh jingeh ïa shi katdei ïa ki nongshong shnong namar bunsien hi ki briew jong ka Assam ki shim kabu ban khrong khajna ha ka dor kaba heh ïa ki kino kino ki mar jong ki nongshong shnong Khanduli.
U Waheh Shnong Khanduli u Bah Yooshida Nongspung u la ong, ha ki por mynshwa ruh ka Assam ka la pyrshang ban sieh ïa ki post light ban pynpur sha kito ki jaka jong ka Khanduli ba shong ba sah da ki nong Karbi, ka pyrshang ruh ban shna ïa ki water shed, bus shed bad kiwei kiwei bad naduh katei hi ka por ka Dorbar Shnong Khanduli ka ïeng ban ïaleh pyrshah bad pynsangeh ïa ki jingpyrshang jong ka Assam haduh kine ki sngi.
“Lada ka Assam ka ïai bteng ban buh ïa katei ka khyrdop jong ka hapoh ka shnong Khanduli ngin ym shong kli kti ngin ïeng ïaleh pyrshah namar ka dei ka hok kynti jong ngi naduh ki hyndai hynthai haduh mynta mynne,” la ong u Waheh Shnong.
