Shillong, Ïaïong 18:
Ka Khun Hynñiewtrep National Awakening Movement (KHNAM) ha ka Sngi Balang kan sa leit ban sam ïa ki kot lyngkdop ban pynsngewthuh paidbah halor ka jingdonkam ban pynduh noh ïa ka ‘Personal Interview’ haba ïadei bad ka jingthep kam Sorkar.
“Ka Sorkar India naduh u snem 2016, lyngba ka ‘Office Memoran-dum’ ka la rai ban pynduh noh ïa ka ‘Personal Interview’ haba thep kam Sorkar ha ki kyrdan Group B, C bad D bad ha kajuh ka lynti, ki 23 tylli ki Jylla ka Ri India ki la shim ïa kajuh ka sienjam halor ka nongrim bad jingdonkam ban pynduh noh ïa ka jingthep kam be-aiñ, jingthep kam lyngba ka jingithuh Myntri, jingithuh longheh-longhaiñ bad jingthep kam lyngba ka jingthong pisa, khnang ba ki samla kin ym shah knieh ïa ka hok jong ki,” ong ka kyrwoh na ka seng.
Kum ban shu pynkynmaw, ka seng naduh u snem ba la dep ka la thoh sha ka Sorkar Jylla ban shim ïa kijuh ki sienjam bad ban weng noh ïa ka ‘Personal Interview’ na Meghalaya bad dang shen ka la thoh bad dawa biang ïa katei kajuh ka jingdawa na ka Sorkar MDA-2 watla ka don ka jingshim sting jong ka Sorkar.
“Kane kam dei ka mat jong ka KHNAM marwei, hynrei ka dei ka jingdonkam na ka bynta ka lawei ki samla ka Ri. Ngi ïohi la bun ki samla ki la duh jingkyrmen wat ban thep kam Sorkar ruh, namar kata, ngin hap ban leh eiei, ngim lah ban shu peit kai ïa ka jingduh jingkyrmen ki samla ka Ri,” ong ka kyrwoh.
Ka jingthmu jong katei ka kot lyngkdop ka long ban pynsngewthuh paidbah ïa ka jingdonkam jong katei ka mat bad ban pyntikna ïa ka rukom thep kam kaba khuid ba suba.
Shuh shuh seng ka la ong ba lada ka Sorkar ka ïai leh mynthi, kata kan khot da ka jingïalang paidbah ka baheh bad lada donkam ruh yn ujor da ka PIL.
