Shillong, Ïaïong 18:
Ka Sorkar Jylla lyngba ka tnat pule puthi mynta ka dang pynkhreh na ka bynta ban kynthup ne pynrung ïa ki katto katne ki lynnong jong ka Central Board of Secondary Education (CBSE) hapoh ki skul ba hap hapoh ka Meghalaya Board of School Education (MBoSE).
Ïa kane la pyntip da u Myntri ka tnat Pule Puthi ka jylla u Rakkam A Sangma ha ka Sngi Ba-ar haba kren sha ki lad pathai khubor, ha kaba u la ong, sorkar jylla ka dang pynkhreh ban kynthup noh ïa ki katto katne ki lynnong CBSE hapoh ki skul ka MBOSE.
U Myntri u la ïathuh ba ïa kane la leh na ka bynta ban pynlong ïa ki khynnah bad ki samla ka jylla kiba la pynkhreh lada ki donkam ban hap ïakhun ïa ki eksamin bapher bapher ha kylleng ka ri India.
“Ka sorkar jylla lyngba ka tnat Pule Puthi ka dang pynkhreh ban pynrung noh ïa ki katto katne ki lynnong jong ka CBSE sha ki skul MBOSE namar kane kan pynlong ïa ki khynnah skul bad samla pule ka jylla ban ïakot bor bad kiwei ki samla pule ha kiwei pat ki jylla ka ri India,” ong u Rakkam.
“Wat haduh mynta na ka liang ka sorkar lane ka tnat Pule Puthi kam pat shim rai khatduh halor kane, hynrei kane ka jingkynthup ïa ki lynnong jong ka CBSE kan wanrah ka jingkyrkhu ïa ki khynnah skul bad samla pule jong ka jylla,” la ong u Rakkam.
