Nongpoh, Ïaïong 18:
Kumba 2000 ki symbai siej ki la ingkhong khait na ka jingthang dusmon jong ki runar hapoh kawei ka khlaw kaba hap hapoh ka jingpeit jong ka Ri Bhoi Tourism and Environmental Development Forum (RBTEDF) kaba don ha ka shnong Umskun, Ri Bhoi District.
Haba kren sha ki lad pathai khubor ha ka Sngi Ba-ar, u Bah Plielad Tiewsoh, President jong ka RBTEDF u la ong ba kane ka jingjia shah thang dusmon jong ka khlaw ka dei kaba la jia ha ka 12 tarik mynta u bnai. U pynpaw ruh ïa ka jingsngewsih bad sngewkhia jur halor kane ka jingjia kaba la wanrah ïa ka jingduhnong kaba khraw ïa ka mei mariang tang na ka daw jong ka jingthang dusmon jong ki briew ki bym lah satia ban tip.
U la ïathuh ruh ba ha katei ka khlaw na ka liang ka seng ka la thung kumba 2000 ki symbai siej la kumba shi snem eiei. Hynrei lyngba kane ka jingleh dusmon jong ki runar, baroh kitei ki jingtrei shitom ki la sep-ei bad ka la wanrah ïa ka jingjot kaba khraw ïa ka mei mariang.
Shuh shuh na ka liang u Bah Tiewsoh u la ïathuh ba ïa kine ki symbai siej kiba don kumba 2000 tam la thung ha katei ka khlaw ban pynneh pynsah ïa ka mariang lyngba ka jingbei tyngka jong ka North East Cane and Bamboo Development Council (NECBDC) na ka bynta u snem 2021-2022 bad kitei ki symbai siej ki dei kiba la sdang ban jrong kumba 2 lane 3 phut eiei.
Halor kane ka bynta, na ka liang ka RBTEDF ka pynrem jur ïa ki runar kiba donkti halor kane ka kam ban pynjot dusmon ïa ki khlaw ki btap bad ka mariang sawdong sawkun. Ka seng ha kajuh ka por ka kyntu jur ïa ki paidbah ba ki dei ban husiar naba thang kulmar ïa ki khlaw namar kane ka jingleh kaba khlem pyrkhat kan wanrah ïa ka jingjot ym tang ïa ki khlaw ki btap, hynrei wat ïa ki mrad ki mreng bad ktah ruh ïa ki tyllong umbam umdih.
