Geneva, Iaiong:
Katkum ka jingpynbna ia kaba lah pynbna paidbah da ka Federation International of Football Association (FIFA) ka long ba ka Argentina kaba la rah ia ka nam lahduh na ka lympung ialehkai World Cup 2022 ha Qatar, ka la ioh mynta ban pynlong ia ka U-20 World Cup 2023. Katei ka ri ka la shim noh ia ka jaka jong ka Indonesia, kaba la shah weng noh na katei ka synjuk pyniaid jingialehkai phutbol ha ka pyrthei ban pynlong ia katei ka lympung ialehkai.
Na ka liang ki Bureau jong ka FIFA Council ka la pynthikna ia katei ka rai hadien ba ka Argentinian Football Association (AFA) ka la dep ban phah ia ka jingtyrwa iathong ka jong ka bad ruh ba ki nongkitkam ba hakhmat jong ka FIFA ki la leit ban jurip ia ki madan ialehkai kiba don ha katei ka ri jong ka thain Shathie ka ri America.
Kumta ha kaba iadei bad katei ka bynta jong ka lympung, ka khubor ka iathuh ruh ba katei ka lympung ialehkai kan plie paidbah naduh ka 20 tarik u Jymmang haduh ka 11 tarik u Jylliew. Nalor kata, la ong ruh ba kan dei ka sien kaba nyngkong ba kane ka ri kan ioh ban pynlong ia katei ka lympung ialehkai naduh snem 2001.
Nangta ha kaba ia dei bad ka jingpynlong ia ka prokram pyniakab ba kyrpang na ka bynta ki kynhun ialehkai ki ban ioh rung sha ka lympung ha ki group bapher bapher kan long ha ka 21 tarik mynta u bnai ha ka shlem treikam ba ha khlieh duh jong ka FIFA kaba don ha Zurich.
