Shillong, Ïaïong 18:
U President ka United Democratic Party (UDP) u Bah Metbah Lyngdoh u la ong ba u la dep ïakren bad u Myntri Rangbah ka Jylla, u Conrad K Sangma, halor ka bhah thung kam thung jam lane ka State Reservation Policy bad ka Roster System.
Haba kren sha ki lad pathai khubor ha ka Sngi Ba-ar, u Bah Metbah u la ong ba katei ka mat ka long kaba donkam bha ban ïakren khnang ba ka jingïakren ka dei ban long na ka bynta ka bha ka miat jong baroh ki jaidbynriew kiba shong ba sah hapoh ka jylla Meghalaya.
“Ha ka sngi ba u (CM), u shong ophis nyngkong, nga la ïakynduh shimet ïa u bad ïakren bad u halor ka kam jong ka Reservation Policy bad ka Roster System,” la ong u Bah Metbah.
U Bah Metbah u la ong ba u la wanrah ïa katei ka mat hakhmat jong u Myntri Rangbah ka jylla namar katei ka mat ka dei kaba bun ki jyrwit jyrwat bad u la ong ba ka long kaba donkam ban ïakren bniah na ka bynta ka bha ka miat jong baroh ki jaidbynriew ha ka jylla bad ka sienjam ban shim ka dei ban long da ka lynti kaba jai jai bad ka jingsuk.
“Nyngkong eh, ka rynsan ba biang eh ka dei bad u Myntri Rangbah. Kane ka dei ka rynsan kaba dei. Ngi la pynsngew ïa ka jingsngew jong ngi halor kane ka kam bad u Myntri Rangbah u la ai ïa ka jubab kaba sngewtynnad ba ngin sa ïakhmih bniah ïa kane ka kam,” la ong u Bah Metbah.
Haba kylli halor ka nongrim jong ka UDP la ka jingpyntreikam ïa ka Roster System kan long nangne shakhmat ne naduh ki snem ba dang pyntreikam ïa ka Reservation Policy, na ka liang u Bah Metbah u la ong ba uno uno u briew u don la ka jong ka jingkwah, hynrei kaba donkam hi ka dei ban long na ka bynta ka bha ka miat jong paidbah ka jylla.
“Nga kwah ban ong ïa phi hangne ba kane ka kam ka dei kaba jyrwit jyrwat bha. Uwei u lah ban ong nga kwah kumne nga kwah kumtai hynrei ngi don hangne na ka bynta ka bha ka miat ki paidbah ka Jylla. Da ka jingkitkhlieh, ngi hap ban pynthikna ba kano kano ka kam ba ngi shim ka dei ban long ha ka lynti kaba dei,” la ong u Bah Metbah.
Utei u nongïalam u la ïai ban ba katei ka kam ka dei kaba bun bha ki jyrwit jyrwat bad kaba donkam ka long ban hap ïakren bniah bad ki kynhun bapher bapher ha ka Sorkar. Nalor kata ruh u la ong ba ka seng kan sa buh ïa ki mat bad kan sa ai ïa ki jingai jingmut halor katei ka kam.
Ha kaba ïadei pat bad ka jingdawa jong ka seng Voice of the People’s Party (VPP) ban shong bishar thymmai ïa ka State Reservation Policy, na ka liang u Bah Metbah u la kyntait ban kynthoh eiei halor katei ka jingdawa jong ka VPP.
“Ngam don jingsngew halor kane ka mat ba la rah da kawei pat ka seng saiñ pyrthei. Nga don jingsngew tang ïa la ka jong ka seng saiñ pyrthei,” la ong u Bah Metbah.
Shuh shuh u Bah Metbah u la pynpaw ruh ba um don jingtip mano ba wanrah ïa ka mat halor ka jingdonkam ban khot ïa ka Dorbar Kyrpang lane ka ‘Special Session’ hapoh ka ïingdorbar thawaiñ ban ïakren halor ka Roster System bad ong ba kane ka kam ka donkam ban hap ïatai shuwa ha ka rynsan kaba dei bad yn sa ïa peit hadien pat kumno ban leh.
Haba kdew halor ka jingkren jong ka UDP ba ka long kaba donkam ban bishar thymmai ïa ka Reservation Policy ha ka mat ïalap ilekshon jong ka, na ka liang u Bah Metbah u la ong ba ka jingshong bishar thymmai ka dei ban long ha ka rynsan kaba dei.
“Kane ka dei kaba nga ong, ngin shong bishar thymmai ha kano ka lynti? Ha ka rynsan kaba dei. Kane ka dei kaba ngi hap ban sngewthuh”, la ong u Bah Metbah.
