Shillong, Ïaïong 18:
U Bah A.L Hek uba dei u Myntri ka Sorkar Jylla bad ruh u MLA ka Bharatiya Janata Party (BJP) na Pynthorumkhrah konstitwensi u la pynpaw ïa ka jingsngew ba ïa ka ‘Roster System’ dei ban treikam naduh nangne shakhmat ym naduh ki snem ba la leit noh.
Ha kaba ïadei bad kane, u Bah Hek u la pyntip ba u la leit ban ïakynduh ïa u Myntri Rangbah ka jylla u Conrad K Sangma ban pynsngew halor ka Roster System bad kiwei kiwei ki mat.
“Katkum ka jingsngew jong nga shimet, ïa ka roster system dei ban pyntreikam nangne shakhmat ym ban pyntrei naduh ki por ba mynshwa,” la ong u Bah Hek haba ïakren bad ki lad pathai khubor ha ka Sngi Ba-ar bad bynrap ba ka long kaba kongsan ban khmih biang ïa ka Reservation Policy kumba ka long mynta bad dei ban pynlong ïa ka jingïasyllok bad ka jingïatai da kaba khot lang ïa baroh kiba don bynta.
Nalor nangta u Bah Hek u la pyntip ba na ka liang ka BJP ka la dep thaw ïa ka committee ha kaba ïadei bad kane ka mat bad la thung Convener ïa u MLA barim ka Mawsynram u Bah HM Shangpliang. Katba ki dkhot ki kynthup ïa u Bah Sanbor Shullai, MLA, u President ka BJP u Bah Ernest Mawrie, u nongaiktien ka BJP, Bah M. Kharkrang, ki Legal Adviser ka seng, kita u Bah Vivan G Kynta bad u SP Mahanta lem bad ar ngut ki nongïalam ka seng na rilum Garo, kita u Edmund K Sangma bad ka Ferlin CA Sangma.
