Boston, ïaïong:
Sa shisien pat u Evans Chebet na ka ri Kenya uba dang iai bat kum u lahduh ha ka pyrthei, sa shisien biang pat u la lah ban khur shalade ia ka jingjop ha ka Boston Marathon bad uba la pynpulom noh ia ka jingangnud kaba baroh shi katta jong u Eliud Kipchoge na ka bynta ban thaw rekod thymmai ha ka lympung. U Evans u la poi sha ka thong jong ka jingjop ha ki 2 kynta, 5 minit bad 54 sekhon.
Shuh shuh ruh napdeng ki thei ialehkai, ka Hellen Obiri kaba lah khur arsien ia ka takma Rupa na ka lympung ialehkai Olympic ha ka 5,000m, ka lah rah ia ka jngjop na katei ka lympung ialehkai ba mynta da kaba pyndep ha ka por 2:21:38 bad ka long ka nongialehkai kaba ar na ka ri Kenya ban khur ia ka nam lahduh nalor u Evans. Kumta ruh ka Amane Beriso na Ethiopia ka la wan ha ka kyrdan ba-ar da 12 sekhon shadien ia kaba lah bud pat da hynniew sekhon hadien da ka nongialehkai na Israel ka Lonah Salpeter.
U Kipchoge u lah wan ha ka jak aba hynriew kaba long ruh ka jingshah rem kaba lai ha kum kitei ki lympung ialehkai kiba heh na ka bynta ban jam bad ki 12 jingjop bad u Scott Fauble u long u nongialehkai bahakhlieh na ka ri America uba lah wan ha ka jaka ba hynniew.
Hynrei u Chebet u long uba nyngkong ha ka ban khur biang sa shisien ia ka nam lahduh naduh ka por jong u Robert Kipkoech Cheruiyot uba lah rah ia ka thong jingjop lai sien lynter kata naduh u snem 2006-08.
Ka khubor ka iathuh ruh ba ka tei ka lympung ialehkai ia kaba lah pynlong mynta u snem ka long ruh ka shibynta jong ka rynsan jied nongialehkai na ka bynta ba kin shah jied sha ka rynsan jied nongialehkai jong ka lympung Olympic 2024 ka ban sa long ha Paris; nongbah jong ka ri France.
