Shillong, Ïaïong 18:
Ka Voice of the People Party (VPP) haba pynpaw ka jingsngewkmen ïa ka jingnoh mynsiem jong ki paidbah sha ka seng bad ka jingangnud ban pynkhlaiñ ba ki la shna ïa ki ‘Whatsapp Group’, ka la kyrpad ba kin pynkut noh ïa kum kine ki ‘group’ ba la dep ban shna.
Ha ka kyrwoh khubor ba la pyllait da u Nongaiktien ka VPP u Dr. Batskhem Myrboh u la ong, “Ha ka jingsngew ieit bad khamtam bad ka jingangnud jong ki paidbah ban nang pynkhlaiñ shuh shuh ïa ka seng, la mih bun kiba shna ïa ki WhatsApp Group bapher bapher. Hynrei na ka liang ka shlem treikam jong ka VPP pat ka sngew dei ban kyrpad ïa ki paidbah ban kiar tyngeh ban shna ïa kum kine ki WhatsApp Group namar ki lah ban pynmih jingeh ki bym sngewtynnad ïa ka seng”
“Kumta ngi kyrpad ïa phi ban pynkut noh ïa ki kum kine ki ‘group’ ba la dep shna bad ban kiar na kaba shna thymmai ïa ki,” la ong u Dr. Batskhem bad bynrap ba dei tang kito kiba la ai bor da ka seng kiba lah ban shna ïa ki Whatsapp group ne kiwei pat ki ‘social media group’ ha ka kyrteng jong ka VPP.
U la ong ba ïa kane la donkam ban leh namar ka jingdonkam ban wanrah ïa ka jingryntih (discipline) ha ka rukom treikam ka VPP bad ban nym ailad ïa ka kynrum kynram kaba lah ban mih na ki ‘riew shim kabu.
Nalor kata, u la ong ka seng kan nym shim ïa ka jingkitkhlieh lada jia eiei kaba sniew na ki rynsan ‘social media group’ kiba shna ha ka kyrteng ka VPP khlem da ïoh jingbit na shlem treikam ka seng.
