Shillong, Ïaïong 18:
U kyrtong ka UDP na Sohïong konstitwensi, Bah Synshar Lyngdoh uba baroh ki ju tip kum u ‘Pup’ u la kular ba ki kam ba u Bah HDR Lyngdoh uba dei u kñi jong u, un pyndep ïa ki kam ba dang sahteng lada ki paidbah ki jied ïa u ha kane ka ilekshon MLA ka ban long ha ka 10 tarik Jymmang, 2023.
Ïa kine ki kyntien u Bah Synshar u la pynpaw haba ïakren bad ki nongthoh khubor hadien ba u la dep ban thep kyrteng ïalade kum u kyrtong ka UDP ha khmat u Returning Officer ha shlem treikam ka Deputy Commissioner, East Khasi Hills District kaba la long mynta ka Sngi Ba-ar.
Ha kane ka sngi la wan synran lang u President ka UDP Bah Metbah Lyngdoh, u Bah Paul Lyngdoh uba dei u Myntri ka Sorkar Jylla, ki MLA ka UDP naduh u Bah Renikton Lyngdoh bad u Bah Matthew Kurbah ha ryngkat ki nongkyrshan ka UDP na Sohïong kiba la poi palat hajar ngut kiba la wan ap ha khmat ka shlem treikam DC, Shillong.
Haba ai jingkren sha ki lad pathai khubor, u Bah Synshar u la pynpaw nyngkong ïa ka kyrteng u Bah HDR Lyngdoh uba dei u kñi jong u, uba la mih bujli ban shimti ïa kane ka kam saiñpyrthei hadien ka jingkhlad u Bah HDR Lyngdoh.
U la ong ka jingkhlad noh u Bah HDR Lyngdoh uba dei u briew uba la paw hapoh ka jylla ka la long ka jingduhnong ïa ka ïing ka sem, ka konstitwensi bad ïa ka jylla baroh kawei.
“Nga ïeng hangne ha jaka u Bah HDR Lyngdoh namar ki paidbah ka Sohïong konstitwensi ki ju buh jingduwai man ka sngi ban pynmih ïa u nongthawaiñ u ban kren ha ïingdorbar thawaiñ ym ban pynmih ïa u nongmihkhmat u bym lah ban kren eiei ha ïingdorbar thawaiñ” u la ong.
Nalor nangta, u la ong ruh ba ki kam kiba dang bun kiba dang sah, hynrei u kular lada u jop ha kane ka ilekshon un bteng ban buddien ïa ki kam jong u Bah HDR Lyngdoh.
Ha shwa ban leit thep kyrteng, ka UDP Sengkmie hapoh ka jingïalam u Bah Metbah Lyngdoh kum u President ki la pynlong ka jingïalang ban kitbok ïa u Bah Synshar Lyngdoh ha ka jingïadonlang ki MLA, ki nongkyrshan ka UDP Sohïong bad ka kmie u kpa, ki para bad ki bahaïing ha sem bad la buh ka jingduwai kyrpang da u Bah Renikton Lyngdoh uba dei u MLA ka Mawkyrwat.
Hadien kane u Bah Synshar Lyngdoh ryngkat ki bahaïing hasem, ki nongkyrshan bad ki MLA ka UDP ki la leit sha ka shlem treikam Deputy Commissioner, East Khasi Hills District, Shillong ban thep kyrteng na ka bynta ba ki paidbah kin ïoh ban thep ïa ka vote ha ka 10 tarik Jymmang, 2023.
