Khartoum, ïaïong:
Katkum ki khubor la ong ba ka jingiakhun hapdeng ki ar kynhun shipai ha Sudan ka la shim ia ka jingim jong palat 200 ngut ki briew bad 1,800 ngut pat kiba la mynsaw. Ha kane ka jingjia ki hospital bad ki jaka ai jingsumar bapher bapher ruh ki la julor lut bad wat ka bam ruh ka la kyrduh ha ka Lah Sngi U Blei hadien ba mih katei ka jingkynad kaba la neh lai sngi kat haduh mynta.’
Ka daw ba pynlong ia katei ka jingïakynad ka long hadien ka jing-iakhun bad jingiaknieh bor hapdeng kitei ki ar kynhun ban ioh synshar ha katei ka thaiñ. Katei ka jingiakhun ka long hapdeng ki ar kynhun ki shipai jong 2 ngut ki heh shipai kiba la ioh bat ia ka bor synshar ha katei ka jaka naduh u snem 2021, u u heh shipai ka Sudan u Abdel Fattah al-Burhan bad u Symbud heh shipai jong u- u Mohamed Hamdan Daglo, kiba long ki nongialam jong ka tnat shipai ba khlaiñ bor ka Rapid Support Forces (RSF).
Ki tnad wad bniah ki iathuh ba ka jingiakhun ha katei ka nongbah ka la ishyrkhei haduh ba ym lah shuh ban batai la katei ka jingïakynad yn dang lah ne em ban pynsangeh noh ha ka por kaba biang namar ha kane ka por, ki don shibun bah ki mynsiem briew kiba la shu duh ei bad da ki hajar ngut ruh ki la mynsaw bad la jan baroh kawei ka nongbah ruh ki ban hap ban mad ia ki jingeh bad jingkyrduh bam bad ha ki liang baroh.
La ong ba ki paidbah nongshong shnong jong katei ka nongbah ki la shu shong setkut ialade hapoh ki iing ki sem, ha ryngkat ka jingshep tieng kaba khraw namar ka jingiasiat bad ka jingiakhun jong kitei ki ar kynhun shabar ka iing jongki.
Nalor kata, ki paidbah nongshong shnong ki la hap ban mad jingeh haba iadei bad ka jingduh bor ding namar ka jingjulor bad jingthud ki shlem pynmih bor ding namar katei ka jingiasiat ki shipai ha kitei ki 3 sngi ba la leit.
Ha ka step Sngi Nyngkong, u Secretary-General ka UN, u Antonio Guterres u la kyntu ia ki bor pyniaid ka Sudan ba kin ialeh katba lah ban pynsangeh noh ia katei ka jingïakynad kaba jur ha Sudan namar lada ym lah ban tehlakam noh katba katei ka thma kam pat bam duh lut ia baroh ki mynsiem kiba don ha katei ka jaka.
