Hyderabad:
Ka khubor ba la ioh ka iathuh ba ka seng BJP jong ka jylla Karnataka ka la pyndonkam da ka jing-rwai na ka phlim RRR ka Naatu Naatu na ka bynta ban khring ia ki nongshong shnong ban jied bad thep ia ki vote ha kane ka seng. Ki hehduh ka seng BJP ki sngew ba kane ka jingrwai ka dei kaba biang eh na ka bynta jong ki ban pyndonkam ha ban ialap ilekshon sha kylleng ki shnong.
Naduh ba ka jingrwai Naatu Naatu ka la ioh ban rah ia ka Oscar ha u bnai ba la leit ka seng BJP jong ka jylla Karnataka ka la shim ia ka lad ban pyndonkam ia kane ka jingrwai na ka bynta ban khring ia ki paidbah ban ai jingkyrshan.
Hynrei la ong ba ki dkhot ka seng BJP ha ka jaka jong ka ‘Naatu Naatu’ ki la pynkylla noh pat sha ka ‘Modi Modi’ bad ka seng BJP ka la trei shitom bha ban jop bun jaka ha ka jylla Karnataka bad la iathuh ba kane ka jylla lada ka BJP ka ioh ban synshar kan sa pyntreikam ia ki Project baheh kiba kynthup ka Shivamogga airport, Bengaluru – Mysu ru Expressway, Metro Lines bad kiwei kiwei.
Ka jingrwai Naatu Naatu ka da long shisha ka jingrwai kaba la khring ia kiba bun ha kaba wat ki khynnah skul ki la sngewtynnad ban shad ia kane ka jingrwai haba don kino kino ki jinglehkai ha skul.
Ha kajuh ka por kane ka jingrwai kam shim la paw tang ha India hynrei wat sha kiwei kiwei ki bynta jong ki ri ka pyrthei bad la iohi ruh ba bun ki khlur ak phlim bad nongrwai ka Hollywood ki la shah khring ha ka ban shad ia kane ka jingrwai.
