Mumbai:
Ka Vidya Balan ka la shah thung kum ka nongrah ktien jong ka Fashion Brand Shobitam ha kaba kane ka puron ha kine ki bnai ban wan kan sa pyni ia ki riam ki beit bathymmai ba la pynmih da katei ka kompani.
Ka Shobitam ka dei ka kompani kaba pynmih ia ki riam kiba la thaiñ bad suh da ki nongthain jaiñ jong kane ka ri bad la jied ia ka Vidya kum ka nongrah ktien ba kan pynbna ia kiei kiei kiba kane ka kompani ka la pynmih bad kumjuh ruh ban kyntiew ia ka kam thaiñ jaiñ ha India.
Ka Vidya kaba ju sngewtynnad bha ban phong ia ki saree ka ju kwah bha ban pyni bad pynpaw pyrthei ia ka sap kaba ki nongthaiñ jaiñ ki don bad lyngba ka jingshah thung jong ka, kum ka nongrah ktien ka Shobitam lehse kan sa lah hi ban pynurlong ia kane.
Haba iakren halor ka jingshah thung kum ka nongrah ktien ka Shobitam,ka Vidya ka la pynpaw ka jingsngewkmen halor kane bad ong ba kan shim ia kane ka lad ban pynsaphriang ia ki riam ki beit kiba katei ka kompani ka la pynmih bad ban pyniaid iew ruh sha ki bynta jong ki ri ka pyrthei.
Ka Shobitam ka long ruh kawei na ki kompani kaba la pynmih ia ki saree kiba itynnad bad ha kajuh ka por kiba i shongkhia bha.
