Shillong, Ïaïong 18:
Uwei u nongshong shnong ka Williamnagar u la leit mudui sha Meghalaya High Court da ka jingkyrpad ban pynduh ïa ka jinglong MLA u Myntri ka tnat PHE, u Marcuise N Marak, halor ka jingkynnoh ba une u MLA u khlem pyni satia ïa kawei ka ‘case’ kaba dang sah ha kawei ka ïingbishar ha ki kot ki sla jong u ha ka por ba u la leit thep kyrteng ha ka ilekshon MLA ba dang dep shen.
Utei u nongmudui u dei uba la tip kyrteng kum u Luckbirth D. Shira bad u dei u nongthep ‘vote’ jong ka 43-Williamnagar Assembly Constituency. U Shira u la mudui ba u Marcuise u khlem pyni satia ïa kawei ka ‘case’ kaba dang sah kaba don ïa u nombor G.R. Case No. 1 of 1993. Ïa kane ka ‘case’ la mudui hapoh ki kyndon 124 (a) bad 506 jong ka Indian Penal Code (IPC) bad ka dang sah ha ka ïingbishar u Additional Deputy Commissioner ha Williamnagar.
U Shira u la ong ba ha ki kot ki sla jong u Marcuise kiba u la ai ha ka por ba u la leit thep kyrteng na ka bynta ka ilekshon MLA kaba dang shu dep shen, u khlem pyni satia ba u don ïa katei ka ‘case’ kaba dang sah pyrshah ïa u.
Nalorkata, u Shira u la kdew ba ha ki kot ki sla jong ka ilekshon ha u snem 2008 bad 2013, u Marcuise u la pyni ba u don ïa katei ka ‘case’ pyrshah ïa u.
Shuh shuh u Shira u la kam ba u la wad bniah ha kaba ïadei bad katei ka ‘case’ pyrshah ïa u Marcuise bad u la shem ba ka ïingbishar ka khlem pat sait khuid ïa u lane pyllait ïa u na katei ka ‘case’ ba la kdew haneng.
Namarkata, u nongmudui u la ong ba ka jingbym pyntip jong u Marcuise ba u don ïa katei ka ‘case’ ka long kum ka jingleh be-aiñ. U Shira u la ong ba kane ka jingleh ka dawa ba u Marcuise un shah pynduh noh ïa ka jinglong MLA hapoh ka kyndon 100 (d) (I) & (IV) jong ka aiñ Representation of the People Act, 1951.
Kane ka jingmudui ka long ruh pyrshah ïa u Chief Electoral Officer bad kiwei, bad ha ka Sngi Ba-Ar, ka High Court ka la ai hukum ba dei ban phah shithi (Notice) sha kine kiba shah mudui katkum katei ka mukotduma.
Na ka liang ka High Court kan sa shong bishar biang halor katei ka mukotduma ha ka 10 tarik Jymmang, 2023.
